«Маадырларның үези» программаның ийиги агымының киржикчилери амгы үеде «Сенеж» башкарылга мастерскаязынга «Күрүне политиказы болгаш күрүне башкарылгазының системазы» деп өөредилгени эртип турар. Төлевилелди Россияның Президентизиниң даалгазы-биле Россияның улус ажыл-агый болгаш күрүне эргелеп-башкарылгазының академиязының күрүне эргелеп-башкарылгазының дээди школазы боттандырып турар.
«Маадырларның үези» программа хоочуннар болгаш тускай шериг операциязының киржикчилериниң аразындан удуртукчуларны күрүне эрге-чагырга органнарынга болгаш күрүне компанияларынга ажылдап болур кылдыр белеткээринче угланган.
Июнь 18-те тус чер бот-башкарылга айтырыгларынга өөредилге болуп эрткен. Аңаа Президентиниң Администрациязының иштики политика талазы-биле даргазының оралакчызы Евгений Грачев база Россия Федерациязының Президентизиниң тус чер бот-башкарылгазын хөгжүдер талазы-биле чөвүлелиниң кежигүнү Ирина Гусева тус черниң бот-башкарылгазының ролюн болгаш чугулазын тайылбырлаан.
Кижилер — тус черниң бот-башкарылгазының үндезини-дир деп, Евгений Грачев онзалап демдеглээн. Бо системада 4,5 сая кижи ажылдап турар. Тус черде амыдыралдың шынары оларның ажылының шынарындан хамааржыр. Күрүне эрге-чагыргазының чаңгыс аай системазы чурттакчылардан келген айтырыгны дүрген болгаш чедимчелиг шиитпирлээр кылдыр ажылдаар ужурлуг деп, ол демдеглээн.
«Маадырларның үези» деп кадрлар белеткээр программага Ирина Гусева өөредилгениң киржикчилерин тус чер эрге-чагырга органнарынга албан эрттиреринче чалаан, оларның төлептиг үлегер-чижектери – Россияның Маадыры, Оренбург облазының Новосергиевск районунуң чагырыкчызы Нурсултан Муссагалеев база Нижний Новгород хоорайның Думазының баштыңы, Эрес-дидим чорук ордениниң үш дакпыр эдилекчизи Евгений Чинцов бар дээрзин демдеглээн. «Оларның арга-дуржулгазы кижилерни сорук киирер, чуртка канчаар бараан болурун тус чер деңнелинге көргүзүп турар» деп, ВАРМСУ-нуң удуртукчузу, тус чер бот-башкарылгазын хөгжүдер талазы-биле Президент чөвүлелиниң президиумунуң кежигүнү Ирина Гусева чугаалаан.
Тывада «Маадырларның үези» деп федералдыг программаның «Тываның маадырлары» деп дөмей хевири боттанып турар. Июнь 4-те ийиги чалгыгның киржикчилери-биле чугаалажыышкынның бот-тускайлаң чадазы доозулган.
Сентябрь 1-де шилиттинген киржикчилер Тываның күрүне университединге өөредилгезин эгелээр. Тываның күүсекчи эрге-чагырга болгаш тус чер эрге-чагырга органнарының амгы удуртукчулары программа киржикчилеринге дагдыныкчы хүлээлгезин күүседир. Өөредилге программазы 2026 чылдың июль 1-де доостур.
ТР-ниң регионнар башкарар төптүң медээзи-биле.
Чурукту интернеттен хоолгалаан.
