Тываның Чазааның деткимчези-биле Улусчу фронтунуң «Бүгү чүүлдү Тиилелгеже!» акциязын бо чылын база уламчылаан.

Бөгүн Тиилелге хүнүн уткуштур ээлчеглиг чүъктү чоруткан. Кызыл хоорайның администрациязы болгаш албан черлери чартык тонна хире чүъктү чыгган: тус чер бүдүрүкчүлериниң тушенказы, колбаса аймаа, эът, удуур-хаптар дээш оон-даа өске херекселдер бар. Кызылдың мэриязы «Бүгү чүүлдү Тиилелгеже!» акцияда чыл санында киржип турарын сагындыраал.

«Мэрияда коллегаларымга, Тываның Чазаанга, Улусчу фронтуга база мурнуку одуругда тыва дайынчыларга деткимчени көргүзүп турар чаңгыс чер чурттугларымга четтиргенимни илереттим. Төрээн черинден посылка кээрге, кайы хире эргим дээрзин эки билир мен. Биче төрээн черимден келген гуманитарлыг дузаны улуг чоргаарал болгаш өөрүшкү-биле бодум база ап чордум. Ол кижиниң тура-соруун дыка көдүрер» — деп, ТШО-нуң хоочуну, ТШО киржикчилеринге социал дуза чедирер эргелелдиң начальниги Конгар Кылан-оол чугаалаан.

«Оон аңгыда мотоцикл болгаш квадрокоптер садып алыр акша дузаламчызын чорудар бис» — деп, ол немээн.

Тыва чоннуң мурнундан чыгдынган гуманитарлыг дуза ЛУР, ДУР, Запорожье база Херсонск областьтарынга чедер.

Кызылдың мэриязының медээзи болгаш чуруундан белеткээн.