Чоокта чаа Тываның Баштыңының хүлээлгезин түр күүседип турар Владислав Ховалыг Москва хоорайже ажылчын сургакчылаашкынының үезинде федералдыг бюджеттен 1,5 млрд рубльди республикага үндүрүп бээрин дилээн турган. Амгы үеде ук акша-хөреңгини Тываже шилчиткен. Ону медицина, энергетика, оруктар, экономика, көдээ ажыл-агыйы, социал политика, культура болгаш спорт адырларынче чарганын сагындыраал.
Амгы үеде ук федералдыг акша-хөреңгини хуваалда езугаар амыдыралда шиңгээдип эгелээн. ТР-ниң Күш-ажыл болгаш социал политика яамызының дыңнадып турары-биле алырга, социал адырже 45,11 сая рубльди чарыыры көрдүнген. Ооң иштинде 4,5 сая рубльди республиканың Тудуг яамызы таварыштыр дөзевилел-чарыгдал ажылдарынче үндүрер.
Федералдыг акша-хөреңгини 4 аңгы угланыышкынче чарыыр.
Бирги оочурда социал албан черлериниң капиталдыг септелгезин чорудары кол черни ээлеп турар. Аңаа Чеди-Хөл кожууннуң Хову-Аксында «Кадыы кошкак болгаш улуг назылыгларның бажың-интернады» хамааржып, ынаар 3,11 сая рубльди үндүрер. 0,8 сая рубль-биле Өвүр кожууннуң Хандагайтыда «Уругларга болгаш өг-бүлелерге социал дуза чедирер төптүң» септелгезин чорудар. Мөңгүн-Тайга кожуунда социал төптүң септелгезинче 2,2 сая рубль үнер, Чеди-Хөл кожуунда социал төптүң септелгезинче 1,1 сая рубль чарыгдаттынар.
Амгы үеде ук албан черлериниң септелгезин чорудар дугайында документ-саавырлар белен.
Социал албан черлериниң капитал септелгезинден аңгыда, тудуг ажылдарынче 28,0 сая рубльди чарыгдаар. Ынчалдыр Каа-Хем кожууннуң Авыйган суурунга 40 олуттуг 4 чуртталга корпустарының тудуун эгелээр.
Тываның Тудуг яамызы таварыштыр «Хамаатыларның социал хандырылгазы комплекстиг төвү» тудугнуң дөзевилел документилерин ажылдап кылырнче 4,5 сая рубль үнер. Ол ышкаш Таңды, Сүт-Хөл, Каа-Хем, Бии-Хем, Кызыл, Чөөн-Хемчик, Өвүр, Чаа-Хөл, Бай-Тайга, Мөңгүн-Тайга, Эрзин кожууннарга болгаш Кызыл хоорайның социал төптеринге 12 спортчу шөлдү тургузар.

#федеральныесредства #распределение #минтруд #тыванын_аныяктары