Ол дугайында эмчилерниң көрүжү

Эмчилеп турар улустуң эвээш кезии диистер азырап турар чон болуп турар. Хан-дамыр, чүрек аарыгларынга диистиң дузазы база бар. Ээлери хорадап, нервиленип эгелээрге, диис ээзинге чыпшынып, чассып эгелээр. Диисти чассыдып, суйбап турар үеде кижи боду билбес база чазыгып, хорадааны чиде бээр. Хорадавайн баарга, давлениези база бада берген болур.

Ижин-баар аарыгларынга база дузалыг. Диисти суйбаарга, кижиниң ижин хайындырары экижиир. Ижин-баар болгаш сыңый аарыгларынга дүгү чок (сфинкс, египет мау) диистер эки.
Стресс болгаш шылап турар үеде база диистер дузазын көргүзүп турар. Нерви аарыгларынга дүгү узун (сибирский, ангорский, персид, норвежский) диистер уйгузу келбес, хорадаачал улуска эки.
Кара диистер кижиниң багай энергиязын алгаш баар. Сарыг диистер эки энергия ээлеринге бээр.

Иммунитет быжыглаарынга диистиң «даажын» (мурлыкание) хүннүң-не дыңнаарга, ультразвук-биле эмнээн ышкаш болур. Кемдээн балыгларны дүрген эттиндирер. Эртемденнерниң шинчилээни-биле, диис азырап турар кижилер диис чок кижилерден 10 чыл узун назылаар болган. Диис азырап турар кижилерниң хан эргилдези эки чоруп турарындан давлениези нормада болгаш ханында холестерин база эвээш болуп турар. Диис дыргактары-биле ээзин дырбаарга, иглотерапия эрткен ышкаш кижини эмнээр. Бир эвес диис ээзиниң бажынга чыдыксаар болза, ол башты база эмнеп турары ол. Солагай чарын талазынга азы эктинге чыдар болза, чүрээн эмнеп турар боор. Ооргазының бел дужунга чыдар болза, бүүректерни хынадыр болза эки. Буттарынга чыдарга, ээзиниң давлениези чавыс азы доңупкаш, аарыычал болуп турар.

Ынчангаш чүгле кадыыңарны эмнедип эвес, сагыш-сеткилиңерни база эмнээр кылдыр диистиг болуруңарны кузедим.

Чодураа Иргит,
Тывада фэн-шуй специализи.

Чурукту Интернеттен алган

Хоолгалаан