Тываның Баштыңы ПМЭФ-тиң пленарлыг хуралынга Россияның Президентизиниң илеткелинде, аныяктарның ажыл чок чоруунуң айтырыгларын шиитпирлээринге онза кичээнгейни салып турарын чугула медеглел деп демдеглээн. «Республикага бо дээрге бирги сагыш човаашкын-дыр, чүге дизе бистиң чурттакчы чонувустуң 35 хире хуузу аныяктар, олар ажыл чоктарның кол кезээн тургузуп турар» — деп, Владислав Ховалыг бодунуң блогунда тайылбырлаан.
Владимир Путин аныяктарның ажыл чок чоруун эң-не чидиг экономиктиг болгаш социал айтырыг деп демдеглээнин сагындыраал. Ындыг-даа болза, делегейниң өске чурттарынга деңнээрге, Россияда ол эки шиитпирлеттинип турар. Чуртта ниити ажыл чок чорук беш чыл дургузунда 2,5 катап – 2,3хуу чедир эвээжээн, а аныяктарның ажыл чок чоруу – 7,5 хууга. Тывада ол эки байдалда – 18-тен 4,9 хууда келгенин демдеглезе чогуур.
Президент аныяктарны ажылга хаара тударының айтырыын анаа эвес көдүргенин республика баштыңы демдеглээн. Ажылче бир дугаар кирери, мергежилге бодун көргүзери амыр эвес төөгү. Четчир амыдырал, өг-бүлени тудары, ажы-төлдүң төрүттүнери база кижизидилгези – кижиниң келир үеде чурталгазын тодарадыр. Россияның хемчээлинге бо дээрге, чурттуң социал, экономиктиг болгаш демографтыг хөгжүлдезиниң айтырыы-дыр.
«ИТ-технологиялар делегейинге өскен аныяктар дээрге, чаа технологтуг аргаларже шилчип турар үеде экономикада структурлуг өскерлиишкиннерни кылыптар күш-түр, деп Президент чугаалаан. Владимир Владимировичиниң бүгү сорулгаларын дүрген күүседир херек. Чедип келгеш, планны тургузар бис» — деп, Владилав Ховалыг аңаа хамаарыштыр чазакта коллегаларынга чугаалаан.
Владимир Путин форумнуң пленарлыг кезээнде российжи экономиканың өзүлдезин база илеткээн. Россия ВВП талазы-биле Европада бирги, делегейде дөрткү черни ээлээн, нефть болгаш газка хамаарышпас адырның үлүүн элээн көвүдеткен. Ядыы болгаш ажыл чок чоруктуң деңнели төөгүде эң эвээш деңнелде келген – тус-тузунда чүгле 7,2 болгаш 2,3 хуулар.
Президент чурттуң моон соңгаар хөгжүлдезиниң кол сорулгаларын айыткан. Ол дээрге экономиканың структурлуг өскерлиишкиннери, бизнеске деткимчени көвүдедири, боттуң технологияларын тургузары, даштыкы садыг-саарылганы чаа деңнелче үндүрери, ВПК-ни хамааты продукция бүдүрүлгезинче угландырары.
Пленарлыг хуралга Индонезияның удуртукчузу Прабово Субианто, Кыдаттың Күрүне Чөвүлелиниң оралакчы даргазы Дин Сюэсян, ЮАР-ның вице-президентизи Пол Машатиле, Бахрейн хаанының гуманитарлыг айтырыглар талазы-биле төлээзи шейх Насер Бэн Хамад Аль Халифа база киришкен. Араб делегейде эң-не билдингир журналистерниң бирээзи Надим Котеич (ОАЭ) чугаалажылганы удуртуп эртирген.
