Шагаа байырлалының бүдүүзүнде Тыва тускай шериг операциязының зоназында албан-хүлээлгезин эрттирип турар дайынчыларже дөрт чүък машиназы-биле гуманитарлыг дузаны чоруткан. Дайынчы хөделиишкиннер зоналарынче, ол ышкаш Донецк биле Курск областарже дуза аъттаныпкан.
«Бистиң чаңгыс чер чурттугларывыстың камгалал шугумун тудуп турар фронтунуң шупту участоктарын хаара тударын кызыдып турар бис. Ынчангаш чамдык машиналар Белгород-Курск уунче, а өскелери Запорожье, Херсон болгаш ЛУР кирип турар Донецк талазынче үнүпкен» — деп, Улусчу фронтунуң регионалдыг салбырының штаб кежигүнү Эрес Хуурак дыңнаткан.
Тываның Чазааның деткимчезинде «Бүгү чүвени Тиилелге дээш!» бүгү-российжи шимчээшкин-биле республиканың муниципалитет бүрүзүнге гуманитарлыг ачы-буян чыыр акция болуп эрткен. Тус черлерде штабтың идепкейжилери республиканың Камба-Лама эргелелиниң лама башкыларының база К.Б. Ондар аттыг Тыва үндезин культура болгаш ус-шеверлер хөгжүдер төвүниң артистериниң киржилгези-биле акцияны организастаан.
Гуманитарлыг ачы-дуза чүъгүнде хой, инек, аът база сарлык эъди дээш, чаа доңурган тос тонна эът бар. Республиканың малчыннары болгаш буянныг чурттакчылары чеди тонна эът продукциязын дамчыткан. Ол ышкаш ийи «Нива» машиналар, ВАЗ-2109 биле УАЗ автомобильдер, 12 мотоциклдер, 40 хире генераторлар болгаш 40 чылыг пушкалары, 150 чаштынар четкилер, техниктиг дериг-херекселдер, хууда арыг-силиг херекселдери, аъш-чем аймаа болгаш чылыг хептер дайынчыларга чеде бээр. Командирлер чөвүлелиниң дилээ-биле техниктиг дериг-херекселдерни садып, чыгган.
Волонтерлар база улуг үлүг-хуузун киирген: 120 волонтер пунктулары 77 дронга удур шывыгларны, камгалал 80 «Панцир» эгинээштерни, аргаан 90 эжеш уктарны, 50 чылыг курларны, 40 тыва чеңичоктарны, шлем адаанга кедер 50 бөртчүгештерни, 400 камгалалдарны дамчыткан.
«Чүъктү чыып белеткээринге «Тываның буянныг чүректери» идепкейлиг киришкен: эъттерни үлээринге эптиг кылдыр хаптажып, шыгжаан» — деп, шимчээшкинниң удуртукчузу Артыш Монгуш чугаалаан.
Тываның күрүне университеди ректорнуң ачы-буян балын организастааш, генераторну, дериг-херекселдер комплектизин, каяа-даа тура дүшпес автомобильдерге дугуйларны садып дамчыткан. Республиканың аныяк армейжилери дайынчыларже 500 хире чагааларны, 200 хире оңгу лааларын, ламаларның кылганы 1000 ажыг камгалалдарны белеткээн.
Бо неделяда чүъктүң көвей кезии адрестеринге чеде бээр. Шагаа бүдүүзүнде, февральдың 17-ден 18 дүнезинде, Тыва Республиканың Камбы-Лама эргелелинден лама башкылар дайынчыларга мөргүл номналдарын номчуур.
Тыва чазак
