Барыын-Хемчик район судунуң ажыл-чорудулгазы-биле Кызыл-Мажалыктың 2 дугаар ортумак школазының 10-гу классчылары танышкан. Шүүгү органының парлалга секретары Ш. Хомушку уругларга экскурсияны чоруткан. Оолдар, уруглар суд залдары болгаш шүүгү ажылдакчыларының кабинеттеринче кирген. Ол ышкаш элээдилер суд хуралдарының аудиопротоколдарын тургузарын көрген. Оон аңгыда парлалга секретары школачыларга РФ-тиң суд системазының дугайында чугаалавышаан, ооң структуразын, хевирлерин, онзагайларын таныштырган.

Үстүкү класстың өөреникчилери юрист мергежилдиң онзагай талаларын билип алыр аргалыг болганнар. Олар шииткекчилерниң эргелерин болгаш ук эрге-дужаалче кандидаттарга негелделерни билип алганнар. Ук хемчег школачыларның мергежил шилип алырынга ужур-дузалыг болганы чугаажок.

Мира Конгул-оол белеткээн.
Чурукту социал четкилерден алган.