Тываның Аныяктар херектериниң талазы-биле сайыды Субудай Оюн ТывКУ-нуң студентилериниң Каттышкан чөвүлелиниң кежигүннери-биле ужурашкан. Аңаа аныяктар политиказынга хамаарышкан айтырыгларны сайгарып чугаалашкан.

Тыва дыл хүнүнүң бүдүүзүнде сайыт студентилер-биле ужуражылганы төрээн дылынга эрттирген. Ужуражылгага аныяктар ортузунда болуп турар хемчеглерге кады ажылдажылга болгаш студентилерниң бот-идепкейжи хемчеглериниң деткимчезиниң дугайында айтырыгны кол болдурган.

Оон аңгыда Субудай Оюн кызыл диплом-биле доосканнарга күрүне деткимчези болгаш дээди өөредилге черин доозуптурга, аныяктарга арга-шинектер дугайында таныштырган.

Аныяктар яамызының медээзинден Алена НАН-ХОО белеткээн.
Чуруктарны социал четкилерден алган.