«Почитай-ка!» уругларның хостуг үезин чөптүг ажыглаары-биле түр төптерде шыдыраа хүннери болуп эрткен. Ону школаларда директорнуң кижизидилге талазы-биле чөвүлекчилери удуртуп эрттиргенин сагындыраал.
«Чаш назынның навигаторлары» төлевилелдиң муниципалдыг координатору Оргаадай Монгуштуң дыңнатканы-биле алырга, Чөөн-Хемчик кожуунда уругларны шыдыраага өөредир ажыл бедик деңнелде организастаттынган. Чадаана хоорайның 1 дугаар ортумак школазында шыдыраа сонуургаар уруглар кончуг шыырак дагдыныкчылыг – Тыва Республиканың күш-культуразының тергиини, Чөөн-Хемчик кожууннуң Шыдыраа федерациязының даргазы, рейтинг-администратор Арат Даш-оолович Монгуш. Ооң удуртулгазы-биле кожуунга школачылар ортузунга шыдыраа маргылдаазы эрткен болгаш, уруглар боттарының арга-мергежилин көргүзүп, чидиг-чидиг партияларны ойнааннар.
Оон аңгыда Сүт-Хөл кожуунда Кызыл-Тайга суурнуң школазынга оолдар, уруглар шыдырааның дугайында эге билиглерни ап, блиц-турнирге киришкеннер.
Чөөн-Хемчик болгаш Сүт-Хөл кожууннарның школаларындан чүгле регионалдыг эвес, а бүгү Россия чергелиг турнирлерниң киржикчилери, шыырак шыдыраачылар, үнүп турарын демдеглээри чугула. Ол дээрге Чыраа-Бажы ортумак школазындан Аира Дембирел, Чадаана хоорайның 2 дугаар школазындан Аяс Монгуш, Согдиана Сат, Ак-Даш суурнуң школазындан Белек Ондар болур.
Уругларның кышкы дыштанылгазы чүгле Чөөн-Хемчик, Сүт-Хөл кожууннарга эвес, а республиканың өске-даа хоорай-суурларынга ажыктыг, солун эрткенин сагындыраал. Ол бүгүнү школаларда уругларның бот-идепкей төптери организастаан.