Бии-Хем кожуунда Туран хоорайның дугаары 2 школазында тускай шериг операцизянга киржип чораан Чаян Монгуштуң чырык адынга тураскааттынган «Маадырның партазын» ажыткан.
Чаян Монгуштуң өөренип чораан школазынга маадырны сактып, хүндүлел езулалын эрттирген. Чоокта чаа-ла ол школаның тергиин өөреникчизи, бодунга бүзүрелдиг, сонуургалдыг идепкейжилерниң бирээзи турган. Бо хүнде Ч. Монгуш бистиң аравыста чок, ынчалза-даа ооң дугайында сактыышкын мөңгеде артар. Ооң авазы Кара-кыс Биин-ооловнага езулуг эр мөзү-шынарлыг, төрээн черинге ынак оолду өстүрүп кижизиткени дээш чыылганнар чылыг сөстерни чугаалаан. Чаян Монгуштуң маадырлыг чоруу Бии-Хем кожууннуң төөгүзүнге артар.
Донбассты хостажыры-биле тускай шериг операциязынга киржип чорааш, амы-тынындан чарылган Маадыр кезээ мөңгеде уттундурбас.
