Бо күзүн Тывага чаа школалар ажыттынар. Кызыл хоорай база Кызыл, Таңды, Улуг-Хем, Чөөн-Хемчик, Мөңгүн-Тайга кожууннарның школачылары амгы үениң каас-чараш өөредилге албан черлеринге быжыг билигни алыр аас-кежиктиг болурлар.
Владислав Ховалыг, Тываның Баштыңы:
— Кызыл кожууннуң ыраккы Каа-Хем суурунга 825 олуттуг улуг школа спортчу-культура төвүнүң чанынга ажылдап эгелээр. Кызыл хоорайның «Спутник», «Мөңгүн» микрорайоннарынга база Таңдының Баай-Хаак суурунга чаа шак-ла ындыг школалар ажыттынар. Оон улаштыр Чөөн-Хемчиктиң Чадаанага 616 олуттуг база Улуг-Хемниң Чодураа суурга, ол ышкаш ырак-узак Мөңгүн-Тайга кожууннуң Кызыл-Хая суурунга 176 олуттуг школалар туттунар.
2024 чылга чедир амыдыралга боттанган президентиниң «Өөредилге» национал төлевилелиниң ачызында регионувуска өөредилге адырының инфраструктуразын чаартыр аргалыг болган бис. Ам бо ажыл «Аныяктар болгаш уруглар» национал төлевилелдиң иштинде боттанып эгелээн.
Амгы үеде чаа албан черлериниң дериг-херекселин четчелээр ажыл чоруп турар. Тываның Өөредилге яамызынга чаа школаларга ажылдаар күзелдиг башкылар-биле ужуражылганы кылып, Ажык эжиктер хүнүн эрттирерин даастым. Ооң-биле чергелештир өске көдээ школалар быжыг мергежилдиг кадрларын чидирбес ужурлуг. Муниципалитеттер-биле бо ажылды дүүштүрери чугула.
