Тываның Баштыңы Владислав Ховалыгның Дээди Хуралга Айыткалынга хамаарыштыр аныяктар боттарының бодалдарын чугаалап турар.
Артыш Монгуш, «Тываның буянныг чүректери» шимчээшкинниң удуртукчузу:
— Бөгүн Тыва Республиканың Баштыңы Владислав Ховалыгның Айыткалы бистиң регионувуска улуг ужур-уткалыг болуушкун болган. Айыткал чурттакчы чоннуң база хөй-ниитиниң кичээнгейин хаара туткан. Ук документиде республиканың хөгжүлдезиниң кол-кол угланыышкыннарын демдеглээн, ол ышкаш чугула социал бөлүктерниң деткимчезинче кол кичээнгейни углаан, ол чүүл — амгы үениң байдалдарынга онза таарымчалыг.
Айыткалдың база бир кол кезээ — тускай шериг операциязының киржикчилеринге деткимче дугайында чугаалааны. Кажан бистиң дыка хөй чаңгыс чер чурттугларывыс Төрээн чуртун камгалаар херекте киржип турда, оларга ачы-дузаны кадары чугула.
2025 чылды Ада-чурт камгалакчыларының чылы кылдыр чарлааны — шериг албанының база патриотчу чоруктуң чугулазын херечилеп турар. Бо шиитпирни хүлээп алганы таварылга эвес, чурттуң камгалакчыларының ачы-хавыяазын ниитилелдиң үнелеп турарын көргүскен.
Ада-чурт камгалакчыларының чылында аныяк-өскенниң патриотчу кижизидилгезинге, маадырларның тураскаалдарын мөңгежидеринге, дайын хоочуннарының деткимчезинге хамаарышкан элээн хөй ажылдарны чорударын планнаан.
Ук эгелекчи саналдар өзүп олурар салгалдың чурттуң төөгүзүн хүндүлээр, шериг албан-хүлээлгениң чугулазын угаап билирин хевирлээринге дузалаар. Патриотчу чорукка чажындан кижизиттинер ужурлуг, бистиң республикавыс бо чугула хүлээлгени күүседиринге белен.
Тываның Баштыңы Владислав Ховалыгның Айыткалы дээрге-ле регионнуң хөгжүлдези болгаш чурттакчы чоннуң деткимчезинче оруктуң кол базымы болур. Тускай шериг операциязының киржикчилеринге онза кичээнгей болгаш Ада-чурт камгалакчыларының чылын чарлааны — чүгле хүндүткелдиң демдээ эвес, а берге үеде бот-боттарын деткижип, ниитилелди демнештирер боттуг арга. Бис, шуптувус, эгелээшкиннерге идепкейлиг киржип, республикавыстың сайзыралы дээш болдунар-ла чүүлдерни кылыр ужурлуг бис.
Мира КОНГУЛ-ООЛ белеткээн.
Чуруктарны социал четкилерден алган.
