Тываның Күш-ажыл болгаш социал политика яамызының дыңнадып турары-биле алырга, Барыын-Хемчик кожууннуң Шекпээр сумузунуң «Чемгерикчи инээм» социал төлевилелдиң киржикчилери Шңнне Сергей-ооловна база Шолбан Кызыл-оолович Монгуштарның өг-бүлези 2017 чылда кыс бызаалыг инекти алганнар. Ийи чыл болгаш, эр бызаалыг казыразын губернатор төлевилелиниң дараазында киржикчилери, хөй ажы-төлдүг Айлаана Ооржак база Шолбан Сарыгларга хүлээткен.

Ам бо хүнде Монгуштарның инээ малы 5 баш кылдыр өскен. 2020 чылда социал керээниң бирги угланыышкыны таварыштыр 222 муң рубль деткимчени ап, хлеб быжырар бичии бүдүрүлгениң херекселдерин садып алганнар: далган булгаар, соодукчу, миксер дээш оон-даа өске. Амгы үеде олар далгандан кылган аңгы-аңгы чемнерни сумунуң чонунга садып эгелээннер. Бир хүнде 100 хлеб, 100 булочка, 100 пирожноени, 30 кг. рогалик, 10 кг. рулет, 1000 пирожкини быжырып, хууда чагыглар-биле база ажылдап турар.

Мира Конгул-оол белеткээн.

Чуруктарны социал четкилерден алган.