Республиканың удуртукчулары малчыннарның санал-бодалын барымдаалааш, оларны сезоннуг ажылдардан чардыктырбазы-биле, Наадым байырлалын июль 18-20 хүннеринде эрттирер дугайында шиитпирни хүлээп алган. Чаңчыл езугаар Наадым байырлалын август айда эрттирип турган болза, ынчан малчын кижиге изиг түлүк ажыл үези болур.
Наадым үезинде Өг-бүле чылынга тураскааттынган «Салым-чаяанныг малчын өг-бүле» мөөрейин организастаар. Ол ышкаш «Кидисте чуруктар/Картины на войлоке» республика чергелиг мөөрей-делгелге болур. Сарлык, теве, хой дүгүнден ажылдарны өг хоорайжыгажынга делгээр.
Оон аңгыда чаңчыл езугаар спортчу маргылдаалар, өглер мөөрейи, национал оюннар, аът чарыжы, янзы-бүрү ярмаркалар байырлал хүннеринде болурун сагындыраал.
Чурук болгаш медээ социал четкирлерден.
