Кызыл хоорайның школаларының аразынга «Улустуң аас чогаалының тергииннери» деп мөөрейни Кызылдың 9 дугаар гимназиязында немелде өөредилге төвүнүң улусчу педогогика башкылары бедик деңнелге эрттиргенин республиканың немелде өөредилге сайзырадыр төвү дыңнаткан. Мөөрейге 8 аңгы школадан өөреникчилер киришкен. Хемчег «Уругларга – эртем» губернатор төлевилелиниң иштинче кирип турарын сагындыраал.

«Мөөрей 5 чыл дургузунда Кызыл хоорайның школаларының ортузунга эртип келген. Келир чылдан эгелээш республика чергелиг кылдыр организастаарын Тываның национал школалар сайзырадыр институдунуң ажылдакчыларынга сүмелеп тур мен. Мөөрейге школачылар тыва тоолдарны шиижидип ойнап, улустуң ырызын ырлап, ойнаар-кызын көгүдүп, чемгерип, аас чогаалының биче жанрларын бараалгатканнар. Өгбелеривистен дамчып келген «Аас чогаалының тергииннери» мөөрей Тывада чарлаттынган Тургузукчу күш-ажылдың болгаш өг-бүле ыдыктарының чылынга тураскааттынган» — деп, мөөрейниң эгелекчизи болгаш организакчызы, хоочун башкы Светлана Шулуу-Маадыр таныштырган.

Оон аңгыда уруглар Ооржак Маңнай, Түлүш Баазанай, Ооржак чанчы-Хөө, Салчак Бичен, Кара-Монгуш Тевек-Кежеге, Саа Самбуу болгаш өскелерниң-даа тоолдарын презентация хевирлиг кылдыр таныштырган.

Жюриниң кежигүннери уругларның сценага болгаш дыл сайзыралының культуразын, салым-чаяанын, чогаадыкчы чоруун, бот-тускайлаңын, кижизидилге ужур-утказын база хеп-сынын шыңгыызы-биле шииткен. Тиилекчилерге Кызылдың өөредилге департаментизиниң мурнундан шаңнал бижиктерни тывыскан.

Чуруктарны Аржаана Чадамба тырттырган.

#өгбүле ыдыктырыныңчылы #губернатор_төлевилели #уругларгаэртем