Санкт-Петербургтуң делегей чергелиг экономиктиг форумунуң шөлдеринге хөй-ле чугула болгаш ужур-уткалыг ужуражылгалар болгаш чугаалар болуп эрткен. Тываның Баштыңы Владислав Ховалыгның Россияның спорт сайыды Михаил Дегтярев-биле ужуражылгазы – оларның бирээзи. Олар Каа-Хемниң суурда спорт-культура төвүнүң ажылын доозарынга база ооң техниктиг дериг-херекселинге хамаарыштыр чугааны чоруткан.
Узамдыккан бо тудуг төлевилелин доозар ажыл федералдыг спорт яамызының шыңгыы хайгааралында дээрзин сагындыраал. Тываның Баштыңы бо чылдың февральда Москвага ажыл-албан айыы-биле чорааш, объектиде байдалдың дугайында сайытка илеткээн. Улуг Тиилелгениң 80 чылынга база Ада-чурттуң камгалакчызының чылынга тураскаадып «Тиилелге» деп адаан спортчу объектиниң ажыдыышкыны удавас болур.
Чаа спорт-культура төвү Тывада эң улуг болгаш, хары угда 4500 хире көрүкчүлерни хүлээп алыр аргалыг. Ооң ийи каът шөлүнге волейбол, баскетбол, мини-футбол, гандбол болгаш хүрештиң аңгы-аңгы хевирлеринге маргылдааларны эрттирип болур. Төптүң ажыдыышкыны республикага улуг бүгү-российжи болгаш делегей чергелиг маргылдааларны бедик деңнелге эрттирер арганы магадылаар.
«Үрде манаанывыс объектини бо чылын долу ажыглап эгелээр дээш, Россияның Спорт яамызындан улуг деткимчени ап турар бис» – деп, Владислав Ховалыг ужуражылга соонда демдеглээн.
Форум үезинде Тываның Баштыңы Россияның тудуг болгаш чуртталга-коммунал ажыл-агый сайыды Ирек Файзуллин-биле база ужурашкан. Владислав Ховалыг республикада «Амыдыралга инфраструктура» деп чаа национал төлевилелдиң күүселдезиниң дугайында сайытка чугаалап, Шагаа-Арыгга чаа котельная тудар төлевилелдиң дөзевилелин доозуп турарын чугаалаан.
Улуг-Хем кожуунда амгы котельная эрткен чылдың март айда техногенниг озал-ондактан когараанын сагындыраал. Котельныйны эде кылза-даа, хоорайга чаа чылыдылга төвү херек дээрзин экспертиза көргүскен.
Россияның Президентизиниң болгаш Чазааның деткимчези-биле чаа объектини тудар дугайында шиитпир хүлээп алдынган. Владислав Ховалыгның чугаазы-биле алырга, Ак-Довуракка ындыг объектини тударынга чаңгыс аайлаан ол төлевилелди ажыглап болур.
«Таарымчалыг хоорай хүрээлеңин хевирлээри» программаның объектилерин бадылаарынга Тываның чурттакчылары идепкейлиг чоруун көргүскенин Ирек Энварович демдегледи» — деп, Владислав Ховалыг үлешкен. Бо чылын бадылаашкынга Тываның 99 муң ажыг чурттакчылары боттарының хоорайларында болгаш суурларында хөй-ниити шөлдерин чаагайжыдарынга бедик сонуургалдыын көргүскеннер. Ооң түңнелинде үннер саны-биле Тыва Республика мурнакчы беш субъектиниң санынче кирген. Россияның Чазааның даргазының оралакчызы Марат Хуснуллин тываларның эгелээшкиннеринге бедик үнелелди берген.
