Сайгарлыкчы чоруктуң неделязын «Тыва – дириг ужур-чаңчылдарның девискээри» турисчи шуулган-биле эгелээнин сагындыраал. Ооң киржикчилери май 14-15-те Бурган изи болгаш Дурген оргулаажынче туристерниң оруунуң аайы-биле чораан. Ооң түңнелинде кожууннарның чагырга даргаларының киржилгези-биле, туризмниң сайзырап болур аргаларын сайгарып чугаалашкан.

Сайдана Хертек, Тыва Республиканың культура болгаш туризм яамазының оралакчызы:

«Тывага туризмни сайзырадыры-биле, өске регионнардан эксперттерни чалаан бис. Олар маңаа келгеш, Тывада туризм талазы-биле харык-шинээвисти, кандыг угланыышкыннарны кичээнгейге алырын тайылбырлаан. Чугаажок, бо ажыл-чорудулга биске улуг өөредиг болган.
Россияда болгаш бүгү делегейде сөөлгү политиктиг байдалдарны бодай аарак, турисчи угланыышкыннарны чугаалаштывыс. Шуулганда киржип келген туроператорлар база дыка ажыктыг чүүлдерни билип алганнар».