Часкы үеде Тыва Республика чаңчыл езугаар делегей чергелиг «Сактыышкынның сады» деп экологтуг-патриотчу акцияга киржип турар. 2025 чылда ол беш дугаар болуп эртер болгаш Ада-чурттуң Улуг дайынынга Тиилелгениң 80 чыл оюнга тураскааткан.
Пятницада, майның 16-да, Кызылдың арга-арыг ажыл-агыйының девискээринге планнааны езугаар ине бүрүлүг ыяштарның өзүмүн хөйү-биле тарыыр акция кол болуушкун болур. Черби арга-арыг ажыл-агый участогунуң «Сарыг сыра» деп черге ону олуртур. Акция-биле 49 га шөлге 196 муң хады өзүмнерин тарыыры планнаттынган. Аныяк ыяштарны Красноярск крайда Ермаковский питомнигинден садып эккелген.
Кызылдың организациялары, Тыва Республиканың Арбитраж суду, «Чаңгыс демниг Россия» политиктиг партияның регионалдыг салбыры, «Ада-чурт камгалакчылары» тускай шериг опреациязының киржикчилерин деткиир күрүне фондузунуң филиалы, Тыва Республиканың прокуратуразы, Тыва Республиканың Саналга палатазы, Тыва Республиканың Дээди Хуралының (парламент) коллективтери, «Россельхозбанк» биле «Сбербанкының» регионалдыг офизиниң ажылдакчылары ыяштар тарып олуртурунга киржир.
ТР-ниң Арга-арыг яамызының медээзи-биле алырга, Тываның муниципалдыг тургузугларынга акция үезинде 2580 аныяк ыяштарны, арга-арыг фондузунуң девискээринге — 1 миллион 205 муң 48 өзүмнерни тарыыр. Өвүр, Сүт-Хөл, Чөөн-Хемчик, Бии-Хем, Тес-Хем, Эрзин, Таңды, Улуг-Хем, Тожу, Каа-Хем, Барыын-Хемчик, Бай-Тайга, Кызыл база Чаа-Хөл кожууннарда 32 черге ыяштарны тарыырын тодараткан.
Бөгүнге чедир чадаң ыяш, хады, шиви, дыт дээш аңгы-аңгы 460 санныг өзүмнерни олуртурунга 306 кижи киришкен.
Чижээ, Сүт-Хөл кожууннуң Суг-Аксы сууру акцияны эрттирип каапкан: ооң киржикчилери эрткен чылын «Кым-даа, чүү-даа уттундурбаан» деп тураскаалды долгандыр ине бүрүлүг 60 ыяшты олурткан болза, бо удаада ооң санын 80 чедирген. Акция келир салгалга төөгүлүг сактыышкынны кадагалап, ооң-биле харылзааны быжыглаарынга улуг ужур-дузалыг деп демдеглээн.
Күзелдиг кижи бүрүзү акцияга киржип болур. Ону кылыр дизе:
— сад-памяти.рф/ акцияның албан езузунуң сайтызынче кирер.
— Интерактивтиг картада киирген бодунуң регионун база таарымчалыг черин шилип алыр. – Киржикчиге чугула информация келир ужурлуг электроннуг почтаны ажыдар.
Россияның Президентизи Владимир Путинниң «Экологтуг чаагай чорук» национал төлевилелди деткиир дээн даалгазы езугаар, Россияның Бойдус яамызы, Россияның Арга-арыг ажыл-агыйы, Тиилелгениң полководчуларынга сактыышкын фондузу, «Тиилелгениң волонтёрлары» база «Сактыышкын сады» коммерцияга хамаарышпас автономнуг организацияның киржилгези-биле «Сактыышкын сады» делегей чергелиг акция чоруп турар. Ада-чурттуң Улуг дайынында мөчээн кижи бүрүзүнге сактыышкын кылдыр, регионнарның экологиязын экижидери-биле чыл санында-ла 27 миллион ыяштарны тарып олуртуру — акцияның кол сорулгазы.#тывачазак
