Тываның көдээ ажыл-агый техникумунга 1-ги курстуң сургуулдарынга «Төрээн чуртум, төрээн дылым, төрээн чонум» деп ажык кичээлди Тыва дыл хүнүнге тураскаадып, ТР-ниң Улустуң хөөмейжизи, «Тыва чоннуң чоргааралы» деп хүндүлүг аттың эдилекчизи, Тыва үндезин культура төвүнүң өөредилге-методиктиг килдизиниң ажылдакчызы Андрей Монгуш эрттирген.

Сургуулдарга төрээн чурт, төрээн дыл, төрээн чон деп билиглерни тыва улустуң үндезин культуразы, ажыл-агыйы болгаш бодунуң амыдыралы, дуржулгазы-биле холбавышаан, мастер-класс хевиринге кичээлди эрттирген.

«Мен — тыва мен» деп Тываның амгы үеде ыдык ырызы Моолдуң Копту тываларындан сургуул үезинде тып эккелгенин база ук экспедицияны сонуургатпышаан, ырыны бараалгаткан.

Оон аңгыда тыва улустуң йөрээл салыр чаңчылы, улуг аас этпес деп угаадыгларының ханы утказын сургуулдарга тайылбырлап, уругларны төрээн черинге, чонунга, дылынга хумагалыг болурунче кыйгырып, хөөмейлеп, сыгыртып солун кичээлди көргүскен.

Бо күстен эгелеп Тываның көдээ ажыл-агый техникумунда филология эртемнериниң доктору, Национал школа хөгжүдер институттуң кол эртем ажылдакчызы Мира Викторовна Бавуу-Сюрюннуң тургусканы профессионал өөредилге черлеринге тыва дыл, тыва чогаалды өөредир программаның шенелдези чоруп турар. Ук кичээл — программаның кижизидикчи угланыышкынының кезии.

Тываның көдээ ажыл-агый техникумунуң медээзи.