Тываның өөредилге сайыдының хүлээлгезин күүседип турар Ренат Ооржак Эрзин кожуунче ажылчын үнүүшкүннү кылган. Ук кожууннуң школа, садиктериниң удуртукчулары-биле ужуражып, өөредилгениң шынарын бедидери болгаш албан черлериниң нарын айтырыгларын сайгарып чугаалашкан. Ол дугайында сайыт социал четкилерде бодунуң арынында допчузу-биле таныштырган.
«Эрзин кожуунга бир ажылчын хүннү эрттирдим. Ук кожууннуң школа, садиктериниң удуртукчулары-биле ужуражып, өөредилгениң шынарын бедидери болгаш албан черлериниң нарын айтырыгларын сайгарып чугаалаштывыс. Коллегаларым боттарының санал-оналдарын чугаалап турду. Ону демдеглеп алдым. Башкылар-биле ужуражып, танышканым өөрүнчүг болду. Кожууннуң болгаш өөредилге эргелелиниң удуртулгазынга школалар, уруглар садтарының оран-савалырының байдалын анализтээш, капитал септелге программазынче мурнады киирер объектилерниң даңзызын кылырын даастым. Чедиишкиннер бар. Чедимче чок ажыл-чорудулгалыг деп санаттынып турган школаларның ажыл-ижи экижээн. Эрзин кожууннуң чагыргазының даргазы Турген Николаевич Сагды өөредилге адырының айтырыгларын контрольда алган.
Эрткен чылын капитал септелге кылдынган Эрзин школазынга четтим. Ук школаны «Өөредилге системазының школаларын чаартыры» федералдыг программа езугаар чаарткан. Кожуунда оон-даа өске капитал септелге негеттинип турар школалар бар. Чижээлээрге, Бай-Даг ортумак школазының төлевилел-дөзевилел документилери белен, Күрүне экспертизазын эрткен. Коллектив директору Аржаана Александровна
Мунзуктуң удуртулгазы-биле школаны эки байдалда тудуп турар. Ынчалза-даа ол — улуг күжениишкинниң ачызы. Оларга дузалаары чугула! Ол ышкаш Мөренде болгаш өске-даа школаларның документилерин белеткеп турар. Уруглар садтары база программаже кирер дээш белеткенип турар.
Ол ышкаш электроннуг хевирниң отчеттарын шын долдурарының дугайында айтырыгларны чугаалаштывыс. Бай-Даг школазында температурлуг режим доктаамал эвес дээрзин демдеглекседим, оран-саваның эргилээнинден чылыг үнүп турар, ынчалза-даа специалистер кызымаккай ажылдап, чылыгны өйлеп турарлар. Оон аңгыда Бай-Даг суурнуң девискээри соок, өттүр хадып турар. Ону база «демдеглелче» алдым. Нарын айтырыглар бар-даа болза, школада солун чүүлдер хөй. Ховар, онзагай экспонаттарлыг музей ажылдап турар.
Ниитизи-биле алырга, башкылар кызымаккай ажылдап, школазы дээш сагыжы аарып, боттарының арга-дуржулгазын, салым-чаяанын уругларга дамчыдып чоруур – даш чонарынга, ыяштан дүрзүлер сиилбииринге, аргыттынып-дааранырынга өөредип, уругларның салым-чаяанын сайзырадып турарлар.
Уругларга математикага консультацияны эрттирдим. Эрзинниң өөреникчилери эки билиглерин көргүскен. 9-ку классчылар Хертек Олесяны база Кеский-оол Танаа-Херелди онзалап демдегледим. Оларга 11-ги класска чедир өөренип, математикага профильдиг шылгалданы бедик баллдарга дужаап алырын күзээр ийик мен. Башкыларга методиктиг дузаны чедирбишаан, математика башкылары-биле улаштыр ажылдаар бис» — деп, Ренат Ооржак бижээн.
Оон аңгыда сайыт бодунуң блогунда дараазында немелде сөстү киирген: Бай-Дагда малчыннар ажы-төлүнүң интернадынга бичии оолдар-биле кажыктап ойнадывыс. Солун болду. Четтирдим, эрлер!