Республикада IV сарыг шажын шуулганынга белеткел ажылдары үргүлчүлеп турар. Регионнуң спорт яамызының дыңнадып турары-биле алырга, шуулган болур үеге чедир кол-кол спорт объектилериниң чаартылгазын чорудар.

Тываның спорт сайыдының хүлээлгезин күүседип турар Владимир Тулуш «Көшкүн чоннар делегейиниң кавайы» төлевилелдиң режиссёр-тургузукчу бөлүүнүң кежигүннери-биле ужурашкан. Ужуражылганың киржикчилери Советтиг Тываның 5 чылы аттыг стадионга чыылган. Ук стадион шуулганның база бир кол шөлчүгежи болурун сагындыраал.

Ажылчын бөлүк стадионнуң байдалын өөренип көрбүшаан, кылып чорудар ажылдарның хемчээлин үнелээн. Ол ышкаш девискээрге аалчыларга болгаш киржикчилерге таарымчалыг черлерни сайгарып чугаалашкан. Чоокку үеде септелге ажылдары эгелээр.

Ооң-биле чергелештир IV сарыг шажын шуулганынга чедир «Субедей» спортчу школаны чаартыр. Аңаа план езугаар ажылдар болгаш септелгени кылыр. Кызылдың спортчу инфраструктуразы республиканың аалчылары келгиже, арыг-силиг болгаш чараш кылдыр чаарттынар.

ТР-ниң Спорт яамызының медээзинден Мира Конгул-оол белеткээн.
Яамының чуруу.