Кожа-хелбээ Хакас Республикада Россияның Кадык камгалал яамызының “Шира хөл” уруглар санаторийинче тускай шериг операциязының киржикчилериниң 140 хире уруг-дарыын чоруткан. Республиканың шупту кожууннарындан база Кызыл биле Ак-Довурак хоорайлардан 7-ден 15 харга чедир назылыг назы четпээннерни кадыкшылының аайы-биле санаторлуг-курорт эмнээшкининче аъткарган.
2023 чылдан боттандырып эгелээн ындыг хевирлиг хемчегже бо хүнге чедир ТШО киржикчилериниң 837 ажы-төлүн хаара туткан. Чүгле 2025 чылда ол бөлүктен 376 назы четпээннер санаторлуг-курорт эмнээшкинин алган.
ТШО киржикчилериниң ажы-төлүнге санаторлуг-курорт эмнээшкинин болгаш реабилитациязын Россияның Кадык камгалал яамызының уруглар санаторийлеринде, ол ышкаш Красноярск крайның Социал политика яамызының «Тесь» санаторлуг-кадыкшылга төвүнде чорудуп турар. Уругларның көвей кезии Россияның Кадык камгалал яамызының «Шира хөл», «Белокуриха» уруглар санаторийлеринге база «Тесь» төпке кадыкшылын быжыглаан.
Республиканың Кадык камгалал яамызының демдеглээни-биле алырга, чурттап турар чериниң аайы-биле диспансер учедунда турар хоочураан аарыгларлыг назы четпээннерни бүдүн чыл дургузунда Россияның Кадык камгалал яамызының санаторлуг-курорт албан черлеринче чорудуп турар. Путевканы алыр дизе, уругнуң ада-иези болгаш хоойлу езугаар өске-даа төлээлери тус черниң педиатр эмчизинге кирип, уругга санаторлуг-курорт путевказын бээринге билдириишкинни бижип, аңаа уругнуң документилериниң хоолгаларын, ол ышкаш ТШО-га ада-иезиниң киришкенин бадыткаан документиниң хоолгазын кожар.
