Эмчи сестралары Кадык камгалал адырында чугула черни ээлеп турары билдингир. Олар аарыг кижилерни хайгаарап, үе-шаанда эмнерни сыкыртып берип, эмчилерниң даалгазын хажык чокка күүседип турарлар. Оларның бирээзи республиканың 2 дугаар эмнелгезинде процедура кабинединиң эмчи сестразы Елена Түмен-Баировна Ооржак.

Бис, республиканың 2 дугаар эмнелгезинде кадыкшылывысты экижидип, эм-домну үргүлчү ап турар чурттакчы чон Елена Ооржактың ажыл-ижинге кызымаккайын, мергежээнин бо-ла чугаалажыр бис. Ол дамырдан анализ алырда-даа азы дамырже эм салырда-даа, дамырны дораан тып алыр. Чамдыкта хүндүскү салбырда эмнедип турар улус безин «өөренген эмчивис» дээш дилеп алыр.

Эмчи сестраларының ажылын билири, бир дугаарында, эмни сыкыртып азы дамырдан анализти ап турда, дораан көстүп келир болгай. Елена Түмен-Баировнаның холу чымчак, мергежээнин аарыг улус дораан эскерип каар.

Елена Түмен-Баировна Ооржактың дугайында кысказы-биле таныштырайн. Ол 1994 чылда Кызылдың эмчи училищезин дооскан. Ук эмнелге албан черинде 1997 чылдан бээр ажылдап чоруур. Ниити эмчи стажы 34 чыл четкен. Бирги категорияның эмчи сестразы. Ак сеткилдиг, эвилең-ээлдек эмчи сестразы. Эмнелгениң хөй-ниити ажылдарынга доктаамал киржир. Үр чылдарда үре-түңнелдиг күш-ажылы дээш регионнуң Дээди Хуралының, ТР-ниң Кадык камгалал яамызының база РФ-тиң Кадык камгалал яамызының Хүндүлел бижиктери-биле шаңнаткылаан.

Республиканың 2 дугаар эмнелгезинде кадыкшылын быжыглап чоруур чоннуң мурнундан «Тываның аныяктары» солуннуң кол редактору Мира КОНГУЛ-ООЛ.

Авторнуң тырттырган чуруу