Ак-Довурактың даг техникумунуң студентилери кижизидилге талазы-биле чөвүлекчи Шеңне Ховалыгның удуртулгазы-биле Барыын-Хемчик район судунуң ажыл-ижи-биле танышкан.

Шүүгү органының ажылдакчылары студентилерге когараан болгаш каразыттырган кижиниң эрге-ажыының база хүлээлгелериниң дугайында таныштырган. Оон аңгыда аныяктар суд үезинде адвокаттың база очулдурукчунуң ужур-дузазының дугайында билип алганнар.

Ол ышкаш эң кол кичээнгейни назы четпээннер ортузунда корум-чурум үрээшкиннеринче углаан. Студентилерге назы четпээннер ортузунда кем-херек үүлгедиишкиннериниң сан-чурагайын, ооң чылдагааннарын база ону чайладып болур хемчеглерниң дугайында таныштырган. Ук факт-барымдаалар эрге-хоойлу талазы-биле кижизидилгениң болгаш аныяктар ортузунга корум-чурум үрээшкиннеринге удур профилактиктиг хемчеглерниң чугулазын херечилеп турар.

Хемчегниң эң-не солун кезээ – студентилерниң суд хуралын эрттиргени. Олар шииткекчиниң, адвокаттың, прокурорнуң болгаш өске-даа киржикчилерниң ролюн ойнаан.

💬«Шак мындыг хемчеглер аныяк-өскенниң юридиктиг системаны ханы билип алырынга дузалаар. Ол ышкаш студентилерниң хоойлу-дүрүмнү сагып өөрениринге деткимче» — деп, башкы дыңнаткан.

«Чашкы назын навигаторлары» төлевилелдиң медээзинден Мира Конгул-оол белеткээн.
Чуруктарны социал четкилерден алган.