Оюмаа Малчын — Тываның чогаалчылар эвилелиниң аныяктар чөвүлелиниң даргазы, аныяк шүлүкчү, прозачы. Тываның чогаалчылар эвилелиниң кежигүнү, Россияның чогаалчылар эвилелиниң кежигүнү. “Сеткилимниң сөңү” – ооң бирги ному. Ол школачы чылдарындан-на уран сөстүң чараш-каазын билип, элээди назынында шүлүктер кожар салым-чаяаны билдинип келген. Төрээн чуртунуң бойдус-чурумалының онзагай каас-чаражын, чоок кижилеринге: авазынга, ажы-төлүнге, угба-акыларынга ынакшылын, хандыкшылын алгап-мактап бижип турар. Шүлүктерден аңгыда, бо номда аас чогаалдың тоолдар жанры база кирип турары онзагай.
Үгү биле күскежик
Дүннүң кужу үгүжүк
Дүвүрел чок олуржук.
Дүймеп самнаан күскежик
Дүвүлендир халыжык.
Караа чыраан үгүжүк
Халааш, тудуп четпежик.
Үңгүр дилээн күскежик
Үвүрерип дезипчик.
Мээң ачам
Мээң ачам — мөге,
Мээң ачам — күштүг.
Адаан хүреш оюнга
Мээң ачам шүглүр.
Мээң ачам — кежээ,
Мээң ачам — эрес.
Ажыл-ишке дадыккан
Мээң ачам — шыдамык.
Мээң ачам — хөглүг,
Мээң ачам — ыраажы.
Аялгалар чогаадыр
Мээң ачам — хөгжүмчү.
Мээң ачам — эргим,
Мээң ачам — чараш.
Анай-кара авамга
Мээң ачам ынак.
Дииспейим
Эзеп, херлип чытпаспай,
Элдеп, солун кашпагай.
Бөмбүк сүрер шокарбай,
Бөрбеш-ле дээр чарашпай.
Сугдан дезер кортукпай,
Сула чаңнаар тенекпей.
Дидиредир халыырбай,
Дииспейим — эреспей.
Эникпейим
Кулактары сүүрерген,
Карактары көстүктүг.
Ээре бээрге, сезинчиг
Эникпейим чаптанчыг.
Кудумчуга уткуурбай,
Кушталдырып келирбей.
Чалгыны чок эреспей,
Чаптанчыг-ла челербей.
Дагаа оглу чараштар
Чиип-чиип чиипейлер
Чиңгир сарыг хензиглер.
Сып-сыып сыыпайлар
Сыгыр бичии чиирбейлер.
Тараа соктаар чаптанчыг
Дагаа оглу чараштар.
