Айдың дүннү, алдын хүннү, сылдыстарны,
Ак-көк дээрни баштай көрген хараачам дег,
Аа сүдүн авам меңээ эмзирип каан,
Аадып-чайгап доруктурган кавайым дег,
Өргээм болган, өөм болган
Өскен-төрээн Чаа-Хөлүм.

Угулзалаан ширтек ышкаш делгемнери
Улуг-Хову, Шолук-Хову, Терезинни,
Дөргүн-шыгын, аяңнарын, шынааларын –
Дөрүн шимеп, чылгы-сүрүг оъттап чоруур
Өргээм болган, өөм болган
Өскен-төрээн Чаа-Хөлүм.

Кадыр-кашпал Изиг-Кара, Идик-Хончу,
Ханалар дег шораан-сыннар харап алган,
Эрте чаштан өртемчейже эң-не баштай
Эргин артап, эжик ажып баскан черим –
Өргээм болган, өөм болган
Өскен-төрээн Чаа-Хөлүм.
28. 05. 25

Буян ЕНДАН.