Кызылдың школаларында уругларның дыштанылга лагерьлериниң үшкү сезону ажыттынган. Чайны чүгле хөглүг-омак эвес, а ажыктыг билиглерни шиңгээдип алыр кылдыр, Росгвардия ажылдакчылары өөредилге черлерин кезип, тускай айыыл чок чоруктуң кичээлдерин уламчылап турар.

Бо удаада профилактиктиг кичээл Кызылдың 17 дугаар школазынга болуп эрткен. Чаа каас өөредилге өргээзинде чай санында алды аңгы чогаадыкчы бөлгүмнерде үш отрядта алдан ажыг уруг хаара туттунган. Чаштарга айыыл чок чоруктуң дүрүмнерин росгвардейжилер база катап сагындырып, каяа-даа чорааш, кичээнгейлиг-бодамчалыг болурунче кыйгырган. Сонуургакпайлар хөй-ле айтырыгларын салып, дайынчы кижиниң ажылынын дугайында байысаап-ла турганнар. Оларның дериг-херексели, тускай идик-хеви, шлём, бронежиледи, медээ дамчыдар рациязы болгаш корум-чурум үрээннерни оожуктурар чепсээ дээш дөгерезин тудуп көрүп танышканнар. Ужуражылганың эң-не солун кезээ ажылчын автомашина болган. Бичии оолдар ону бүзээлеп, ишти-даштын топтап, чолаачы кижиниң ажыглаар сигналдарын шенеп базып көргеннер. База ол ышкаш росгвардейжилер чаштарга белек-селекти тывыскан. Даштыгаа ойнаар оюннарга херекселди лагерьниң башкыларынга дамчыткан.