Тываның Баштыңы Владислав Ховалыг шериг албанынче күскү кыйгыртылга үезинде регионалдыг кыйгыртылга комиссиязының кол составының ажылын бодун баштаан. Кампанияны эгелээр дугайында айтыышкынга атты сентябрь 23-те ол салган.
Шериг албанынче шериг учедунда турар азы хүлээлгелиг, 1994-2006 чылдарда төрүттүнген оолдарны план езугаар кыйгырткан. 18-тен 30 хар чедир назылыг 700 хире республика чурттакчыларын шериг эрттиреринче кыйгыртырын, Тываның шериг комиссариадының медеглээн. 2024 чылдың январь 1-ден кыйгыртыр назы-харның үстүкү деңнели улгатканын сагындыраал.
Кыйгыртылга талазы-биле республика болгаш муниципалдыг комиссиялар бадылаттынган график езугаар октябрьның 1-ден декабрь 31-ге чедир ажылдаар. Ажылды эгелээр мурнунда, бир дугаарында ТР-ниң Өөредилге яамызының, ведомстволар база организациялар удуртукчулары кыйгыртыр ужурлуг кижилер дугайында медээлерни шериг комиссариаттарынче чорудар даалганы Владислав Ховалыг берген.
Кыйгыртылга комиссияларның кол хүлэлгелериниң бирээзи – шеригже кыйгыртыр кижиниң кадыкшыл байдалын хынаары. Ынчангаш чыылда пунктуларында келген аныяк кижилерге эмчи шинчилгезин эрттирер специалист эмчилерни комиссия составынче киирген.
Тываның Баштыңы кыйгыртылга үезинде чыылда пунктуларынга хөй-ниити чурумун база айыыл чок чоруун хандырары-биле, полиция нарядын дежурныйладыр ажылды организастаарын регионалдыг Иштики херектер яамызынга дааскан. Республиканың эрге-чагыргазы шеригже кыйгыртып турар оолдарның хостуг үезин организастаары-биле артистерниң болгаш чогаадыкчы коллективтерниң оюн-тоглаазын көргүзер дээш ажылдаар. Шеригже байырлыг үдээшкинни эрттирер.
РФ-тиң Камгалал яамызының чаңгыс эвес катап дыңнадып турары езугаар, шериг албанынче кыйгытканнарны тускай шериг операциязынче хаара тутпазын республиканың шериг комиссариады база катап дыңнаткан.
