Суг-Аксы ортумак школазының тергиин эки өөреникчизи, башкыларының чоргааралы, «Баштайгыларның шимчээшкини» уруглар болгаш аныяктарның бүгү-российжи шимчээшкининиң идепкейжизи, спортчу Ай-кыс Монгуш бо чайын эжинге бирги дузаны кадып, амы-тынын камгалаанын Сүт-Хөл кожууннуң чагырга чери дыңнаткан.

– Чайгы дыштанылга үезинде эштеривис-биле хемге эштип, ойнап хөглээринге ынак бис. Август 1-де өөренген аайывыс-биле Хемчик хемивиске эштип чеде бердивис. Элээн болгаш хемниң сыык черинден кежир кылаштажыпкан бис. Канчангаш көрүптеримге, эжимни чалгыг аңдара шаапкан, ол бистен ырап-ла бар чыткан.

Девидээн уум-биле чүнү-даа бодаар харык чок, эжимниң чанынче эштип чорупкан мен. Ол кортканындан менден туттунупкаш, меңээ дузалажыр хамаанчок, сугже киир тыртып эгелээн. Ол үеде бодумну быжыгландыр туттунупкаш, эжимниң читкезинден туткаш, сугдан ушта тыртып эккелген мен.

Хемге үргүлчү ойнап келгеш, эживисти эштип билбес деп эскербээн болдувус. Харын-даа ол дириг арткан. Бо болуушкун биске дыка улуг өөредиг болган – деп, Ай-кыс сактып чугаалаан.

Ай-кыс Монгуш эжинге бирги дузаны чедирип шыдапканы езулуг-ла маадырлыг чорук. Ол үеде «бодум сугга дүже берзимзе» деп бодал ооң бажынга-даа кирбээн.

Сүт-хөлчүлер эрес-дидим болгаш маадырлыг чоруун көргүскен чалыы чаңгыс чер чуртуунга чоргаарланып турар.

Шончалай ХОВАЛЫГ
Авторнуң чуруу