Айдыс, Буяна Доспаннар – 25 дугаар армияның Москваның шериг округунуң ажылдакчылары. Айдыс – чолаачы, Буяна — эмчи инструктору. Республиканың эмчи колледжизин дооскан. Кызыл хоорайның 2 дугаар поликлиниказынга ажылдап турган. Аныяк ава – «Тываның маадырлары» төлевилелдиң киржикчизи. Баштайгы тест айтырыгларын эки баллдарга дужааган, улаштыр өөренир аргазы бар. Бо хүннерде олар кыска шөлээзиниң үезинде Тывазынга келген.

«Аныяк өг-бүле 2023 чылда төрээн чуртун камгалаар дээш керээни чарган. Барык 2 чыл дургузунда тускай шериг операциязында чаңгыс кезекте албан-хүлээлгезин күүседип турарлар. Бир оолдуг, кырган-авазының чанында. Чеди-Хөл кожуунда бажыңны тудуп эгелээннер. Доспаннарның өг-бүлезинге аас-кежикти, быжыг кадыкшылды, чаагай чорукту база аалынче чанып кээрин күзээлиңер» — деп, регионнуң парламентизиниң депутады Эрес Хуурак бодунуң блогунда бижээн.

Аныяктарга тыва парламентиниң «Ада-чурт камгалакчылары» тураскаалдыг медальды тывысканын сагындыраал.

Мира Конгул-оол белеткээн.
Чуруктарны социал четкилерден алган.