Конгар Кылан-оол, чажыт ады – «Тунгус» – тускай шериг операциязының киржикчизи. Юрист, Санкт-Петербургтуң прокуратура академиязын дооскан. Чеди-Хөл кожууннуң культура эргелелиниң даргазының оралакчызы болуп ажылдап турган. 2024 чылдың төнчүзүнде ол тускай шериг операция­зының дугайында «Отряд 22: ZOV» компьютер-тактиктиг оюннуң кол маадырларының бирээзи болган. Ооң кол угланыышкыны – шериг медициназы болгаш инженер-сапёр ажылы.

Конгар Кылан-оол, чажыт ады – «Тунгус»:

— Баштайгы үезинде снайпер кылдыр мени томуйлаан, ынчалза-даа даг камгалакчызы мергежилим тиилеп, шериг эмчизинче шилчээн мен. ЛУР-нуң госпитальдарынга арга-дуржулга кирип, элээн ажылдаан мен. Ооң соонда практика кырында ДУР-га балыглаткан дайынчыларга бирги эмчи дузазын чедирип турдум. Авдеев талазынга штурм бөлүү-биле кады дайынчы даалгаларже үнүп, балыглаткан дайынчыларга дузаны чедиргеш, улаштыр тылче чорудар турдум.

Шериг албан-херээнге берге байдалдарда дүвүрээшкин чок болуру чугула. Шак ындыг чүүлге мени даглар чаңчыктырган. Тускай шериг операциязының мурнунда, 7 чыл иштинде, альпинизмни сайзырадып, даг туризминиң клувун ажыткан мен. Өске регионнарда эш-өөрүм-биле кады альпинизм лагерьлерин организастап, Таңды-Уула, Цаган-Шибэту сыннарының бедиктеринче үнгүлээн бис. Ынчан даг камгалакчызының курстарын доозуп, разрядын камгалап алган мен. Бедик сыннарның ачызында кичээнгейлиг болурунга өөренген мен.

2022 чылдың июнь айда, ачам аар аарый берген үеде, Тываже чанып келген мен. Сентябрь айда чок апарган соонда, чоок кижилерим чуртумга артып каарын дилеп турза-даа, дедир тускай шериг операциязынче чорупкан мен. Өг-бүлемден, ийи кыстарымдан ырап чорууру берге-даа болза, дедир чоруур деп шиит­пирледим. Ол мээң хүлээлгем-дир. 2022 чылдың октябрь 10-да РФ-тиң Камгалал яамызы-биле керээни чаргаш, шериг албанныг болдум.

Эрткен чылдың сентябрь айда сапёр взводунуң командири кылдыр томуйлаттым. Ында амыдырал көрбээн, көңгүс аныяк оолдар бар, чамдыктары ажы-төл безин чок. Ынчангаш дайынчы даалгаларже кезээде бир дугаар үнүп турдум. Бир катап бистиң взводувуска миналыг шөлдү айыыл чок кылдыр арыг­лаар деп даалга берген. Бодум хуумда 10 минаны база шөйүн­дектерни адырган мен. Ынчалза-даа көстүрү багайындан база узун хыыргыыштарның шаптыктыындан кулузун адаанда чыткан минаны көрбейн барган мен. Дайынчы үскүлежиишкин шугумундан мени ыраткан. Баштай Крымга госпитальга эмнеттим, ооң соонда Мос­кваның шериг госпиталынче шилчиткен. Кылымал бутту салган. Чүге-даа хомудавас мен. Бир эвес катап база ол-ла орукту чурттап эртер дээр болза, дөмей-ле шак-ла ынчаар катаптаар мен».

#героитувы

Долузу-биле Тыванын аныяктары/Молодежь Тувы солуннуң июнь айда үндүрүлгезинде.

Чуруктар Конгар Кылан-оолдуң хууда архивинден.