Тыва Республикадан тускай шериг операциязының хоочуннары «Абилимпикс» национал чемпионаттың инвалид болгаш кадыының байдалы кызыгаарлаттынган хамаатылар аразынга профессионал мергежилдер мөөрейлеринге киришкеннер. Россия Федерациязының Президентизи Владимир Путинниң даалгазы-биле организастаан тускай шериг операциязының киржикчилериниң бирги чемпионады июль 25-тен 29-ка чедир Казань хоорайга болуп эрткен. Аңаа Россияның 79 регионундан мөөрейжилер, эксперттер болгаш үдеп чораан кижилер-биле кады шупту 400 ажыг кижи киришкен.
Чемпионатка Тыва Республиканы тускай шериг опреациязының хоочуннары Ай-Хаан Торуш биле Чайдаш Ооржак «Ыяшка сиилбилге» мөөрейге, Леонид Ховалыг биле Вадим Кара-оол «Повар ажылы» мөөрейге, Юрий Нара-Мандып «Дуңзаалаар технологиялар» мөөрейге төлээлээн.
Маргылдааның 15 мөөрейинде: «БПЛА оператору» (30 региондан 51 мөөрейжи), «Дуңзалаар технологиялар» (23 региондан 33), «Автомобильдер септелгези болгаш ажаалдазы» (21 региондан 28) эң хөй киржикчилерни хаара туткан. Ол ышкаш «Повар ажылы», «Чазаныр ажыл» и «Күүседикчи салым-чаяан (Ыры)» сонуургалды болдурган.
Россия Федерациязының 22 субъектизинден 84 эксперт чемпионаттың шииткекчилери болуп, чүгле киржикчилерге демдек салып эвес, а профессионал арга-сүмелери-биле база үлешкен.
Июль 29-та чемпионаттың байырлыг хаашкынының үезинде мөөрейлерниң түңнелдерин чарлаан. Чурттуң 37 регионундан 79 киржикчи тиилеп, бо чылдың күзүн Москвага болуп эртер национал чемпионаттың түңнел кезээнге боттарның субъектилерин төлээлээр эргени чаалап алганнар.
Татарстан Республика, Свердловск область, Красноярск край, Новосибирск область база Москва хоорай тилекчилериниң саны-биле беш лидерниң аразынче кирген.
«Абилимпикс» российжи шимчээшкин шапкын хөгжүлдени ап, сөөлгү он чылда чемпионат инклюзивтиг профессионал өөредилге адырында кол хемчеглерниң бирээзи апарып, амгы үеде бодунуң сорулгазын улам калбарткан деп, Россияның Чазааның Даргазының оралакчызы Дмитрий Чернышенко демдеглээн. «Ада-чуртка бараалгаарын шилип алган кижилер белеткелиниң болгаш күзелиниң аайы-биле аңгы-аңгы адырларга болгаш угланыышкыннарга тускай туруштарны ээлээр ужурлуг дээрзин Президент Владимир Путин айыткан. Тускай шериг операциязының киржикчилеринге «Абилимпикс» ындыг арганы берип турар» — деп, Чернышенко демдеглээн.
Россияның чырыдыышкын сайыды Сергей Кравцов чер алганының хамаарылга чокка, чемпионаттың киржикчи бүрүзү – тиилекчи-дир деп чугаалаан. «Силер чаа арга-дуржулганы шиңгээдип, мергежилиңерни көргүзүп тургаш, эрес-дидимиңерни, тура-соруктууңарны болгаш профессионал чорууңарны көргүскен силер» — деп, ол чугаалаан.
Маргылдаалар Казаньның вертолет заводунуң бүдүрүлге-өөредилге төвүнүң баазазынга (Ростех күркорпорацияның «Россияның вертолеттары» холдинг) болуп эрткен. Россия Федерациязының Чазааның база «Ада-чурт камгалакчылары» күрүне фондузунуң деткимчези-биле Россия Федерациязының Чырыдыышкын яамызы чемпионатты организастаан. Профессионал өөредилге сайзырадыр институт – федералдыг оператор, Татарстан Республиканың Чазаа – регионалдыг оператору.
