Тываның Чазаа республиканың Баштыңы Владислав Ховалыгның удуртулгазы-биле «Тываның маадырлары» регионалдыг программаның Хөй-ниити чөвүлелиниң кежигүннериниң ээлчеглиг хуралы болуп эрткен. Хуралдың шиитпири-биле программаның 30 киржикчизинге дагдыныкчыларның баш бурунгаар даңзызын бадылаан.
Владислав Ховалыг Хөй-ниити чөвүлелиниң хуралын ажыдып тура, регионалдыг программаның Хөй-ниити чөвүлелиниң мурнунда күрүне эрге-чагырга органнарының удуртукчулар аразындан программаның киржикчилеринге дагдыныкчыларны быжыглаар айтырыг тургустунуп келгенин чугаалаан.
«Тываның маадырлары» программаның киржикчи бүрүзү чугула болгаш нарын айтырыгларны шиитпирлээринге беленин, бедик патриотчу хей-аъдын көргүзүп, бир дугаарында, Ада-чуртунга бараан болурунуң хүндүткелдиг үлегерин дайынчы тулчуушкуннар үезинде херек кырында көргүскеннер. Ам дагдыныкчыларның кол сорулгазы – «Тываның маадырлары» программаның киржикчилериниң хууда болгаш профессионал сайзыралынга дузалажып, тускай шериг операциязының киржикчилеринден күрүне эрге-чагырга болгаш тус чер чагырга органнарының системазында удуртулга туруштарынче шилчииринге деткимчени көргүзер ужурлуг» — деп, Баштың демдеглээн.
Хөй-ниити чөвүлелиниң кежигүннери «Тываның маадырлары» регионалдыг кадрлар программазының киржикчилеринге баш бурунгаар тургускан дагдыныкчылар даңзызын таныштырган. Баш бурунгаар даңзыны тургузарда, киржикчилерниң стажировка эртер черинге хамаарыштыр күзелдерин, ажыл-чорудулганың кандыг адырынга ажылдаксап турарын база билиг-мергежилин, амыдыралчы дуржулгазын болгаш эртем-билиин кичээнгейге алганын демдеглээн.
Амгы үеде ажылдап турар Тыва Республиканың Чазааның Даргазының оралакчыларындан, Тыва Республиканың күрүне органнарының удуртукчуларындан, күүсекчи эрге-чагырга органнарының удуртукчуларындан, муниципалдыг тургузуглар баштыңнарындан, Тыва Республиканың Дээди Хурал (парламент), муниципалдыг тургузуглар тус чер бот-башкарылгазының Төлээликчилер хуралдарының депутаттарындан, өске-даа организациялар удуртукчуларындан, ол ышкаш удуртукчу арга-дуржулгалыг культура, эртем, өөредилге ажылдакчыларындан дагдыныкчыларның баш бурунгаар даңзызын тургускан.
«Тываның маадырлары» регион программазының кол кезээ болур «Дагдыныкчы ажылда» кирген регионнуң кол удуртукчулары киржикчилерни деткип, хууда болгаш профессионал өзүлдезинге дузалажып, арга-дуржулгазын дамчыдып, киржикчилерни ажылче хаара тударынга деткимчени көргүзер. Дагдыныкчылар удуртукчу болгаш эксперт байлак арга-дуржулгалыг, көскү тергиидекчи шынарларлыг болгаш ат-алдарлыг кижилер болур.
Бир эвес киржикчи кижини албан-дужаалче томуйлаптар база профессионал ажыл-чорудулгазынга болгаш бодунуң сайзыралынга чедиишкиннерни көргүзер болза, дагдыныкчының программазы чедимчелиг болган деп санаттынар. Ооң-биле чергелештир, ийи тала: дагдыныкчы болгаш хүлээнген кижизи дагдыныкчылар программазының үре-түңнели дээш харыысалгалыг. Ийи тала боттуг үре-түңнелче угланган кады эштежилгени чедип алыр ужурлуг.
Дагдыныкчылар программазы алды чададан тургустунган база бир чыл дургузунда уламчылаар. Ол чадаларда белеткел кезээн, таныжылганы, дагдыныкчы ажылдың хевирин, стажировканы сайгарып, төнчүзүнде – дагдыныкчы биле киржикчи кижи депшип ажылдаарының оруун тургузар ужурлуг.
«Тываның маадырлары» регионалдыг программага киржир конкурс шилилдезиниң түңнелдери-биле 30 киржикчи тодараттынганын сагындыраал. Сентябрьның 1-ден эгелеп Россия Федерациязының Президентизиниң чанында Россияның улус ажыл-агыйы болгаш күрүне албаны академиязының Дээди корпоративтиг эргелеп-башкарылга школазы-биле дугурушкан өөредилге программазы езугаар, Тываның күрүне университединге өөредип эгелээр, ында дөрт модуль база үш чадалыг стажировка кирип турар.
Дагдыныкчыларның төнчү даңзызын сентябрь 2-де киржикчилерге таныштырар.
Тыва чазак
