«Тываның маадырлары» регионалдыг кадрлар программазы республикада чедимчелиг боттанып турар. Ону чурттуң Президентизиниң саналы-биле эгелээн «Маадырларның үези» төлевилелге дөмейлештир кылган. Ук программа тускай шериг операциязының киржикчилеринге болгаш хоочуннарынга деткимчени көргүзер, оларның ажыл-агыйга тургустунарынга дузалаар, удуртулга системазынче мөөңнээр.

«Тываның маадырлары» регионалдыг кадрлар программазының база бир киржикчизи Руслан Ондар бодунуң бодалын мынчаар илереткен:

«Кеээде шериг офицери болур күзелдиг турдум. Мен бичии турдумда милиция турган, аңаа ажылдаар күзелим күштүг турган. Үе база бөдүүн турган, хөй шилилге чок. Колдуунда юрист, эмяи, башкы мергежилдерни шилиир».

Руслан Ондар школаны дооскаш, шериг академиязынче өөренип кирип алган. ИХЯ шугумунга ажылдаан. Спорттуң янзы-бүрү хевирлерин сонуургап, мага-бодун дадыктырган. Ооң соонда Росгвардияга 10 чыл дургузунда ажылдап, «изиг точкаларже» удаа-дараа ажылчын үнүүшкүннерге киришкен.

«Тускай шериг операциязынга балыглаткан соонда, ажылымдан үнген мен. Амгы үеде халажылгада майор эргелиг болуп, Кызылдың Президентиниң кадет училищезинче ажылдап кирдим. Мында кижизидикчи башкы болуп ажылдап тур мен» — деп, Руслан Ондар чугаалаан.

«Тываның маадырлары» регионалдыг кадрлар программазынга киржир дугайында саналды ол чайгылыш чокка хүлээп алган. Шилилде мөөрей шыңгыы эрткен. Анкеталарны долдурган, дайынчы оруунуң дугайында документирлерни дужааган, ол ышкаш лидержи потенциалын хынаары-биле, тестини эрткен.

«Тываның маадырлары» регионалдыг кадрлар программазы мени сонуургаткан. Чүге дизе ында бистиң республикавыстың хөгжүлдезиниң дугайында чугаалап турар. Шупту угланыышкыннар аайы-биле. Ынчангаш 600 хире кижиниң аразындан шилилдени эрткенимге өөрүп тур мен. Бодумнуң таламдан ам-даа улаштыр бот-сайзырадылганы чедип ап, күш-ажылчы оруумну уламчылаар сорулгалыг мен. Шериг албанныгларны деткип турары өөрүнчүг-дүр. Олар боттарының шериг арга-дуржулгазын аныяк-өскенге дамчыдар» — деп, ол демдеглээн.

Сентябрь айда ТывКУ-нуң базазынга Руслан Ондар болгаш өскелер-даа өөренип эгелээрин сагындыраал.

«Тува 24» каналдың сюжединден Мира Конгул-оол белеткээн.