Кашпал-оглу — 2023 чылда «Ратное слово» номинацияда «Россияның чогаалчызы» лауреады атты алган. Ооң шүлүктери «Литературная газета» деп солунга парлаттынган.

Аныяк шүлүкчү, Тываның чогаалчылар эвилелиниң кежигүнү, Россияның чогаалчылар эвилелиниң кежигүнү, «Чаалыг шөлден чагаалар», «Угли войны», « Мөңге шуглак» номнары орус, тыва дылдарда үнген.

Кашпал-оглу шүлүктеринде езулуг тыва эр кижиниң мөзүлүүн, бүдүштүүн, дидимин, мерген угаанын, туруштуун көргүскен. Чеже-даа амыдыралдың бергелерге таварышса, ол тура дүшпээн.

Чайлагларым
Арга-эзим ишти сыңмас элик, хүлбүс,
Арыг, доңмас, соок, катпас дамырактыг
Алызында ызыгуурдан дамчып келген,
Ал-Шум хемим тоолда кирген делгемнери.

Шуудадыр-ла адыжынче сымырангаш,
Дагдыныпкаш, хуваанагын төлгелей бээр.
Дагжап баткан шурамыктың үнү-биле,
Шуваганчы төнмес тоолун ыда-ла бээр.

Шаажаң ышкаш оңгар-оңгар аяңнарга
Шаанак, агы, артыш чыды хөрек долар.
Шаап четпес, делгем сарыг ховуларлыг
Шары, буга бустап чайлаар чайлагларым.

Чуртум оглу
Даглыг черден дайындыва аъттаныпкан
Даш дег кадыг, эрес-дидим — чуртум оглу.
Даңгырактыг, ыдык сөзүн ээлеп чораан,
Дайын-чаадан эглип келбээн чуртум оглу.

Төөгү шагдан чүгүрүктер мунукчузу —
Дөңгеликтиг, аржаан хемниг чуртум оглу.
Халдап келген дайзынче чиге көргеш,
Хая көрбейн, хөме базар чуртум оглу.

Эргим ынак авазынга «ээп кээр мен» дээн…
Эртенги хүн үнмейн баарын кайыын билген.
Чаштыг караан күжүр ие чодуп арткан…
Чаалыг шөлден эглип келбээн чуртум оглу.

Тоол шагдан сарыг сыдым черге дээртпес,
Торгу тоннуг, чойган, пөш дег, чуртум оглу.
Шоглап келген дайзынче удур баскаш,
Шорузу дээш чылча шаапкан чуртум оглу.

Өжегерээн аткаар баспайн, ханы изип,
Өжежипкеш, тынын берген чуртум оглу.
Өскүссүреп, оглу, кызы манап арткан
Өске черде сөөгүн салган чуртум оглу.

Даянгыыштыг адазынга «ээп кээр мен» дээн…
Даартагы хүн дүшпейн баарын кайыын билген.
Даңза тыртып, күжүр ада оглун манаан…
Дайын шөлде мөңге арткан чуртум оглу.