Бай-Тайга кожуун чагыргазының болгаш чонунуң өмүнээзинден Делег Байыр Балыкчыевичиниң шериг албан-хүлээлгезин эрттирип чоруткаш, тускайлаттынган шериг операциязынга дузалап, кызыгаарга албан херээн камгалап, дайынчы даалгазын күүседип тургаш, эрес-дидим маадырлыы-биле кезээ мөңгеде амы-тынындан чарлып чорупканы-биле, ооң ада-иезинге база чоок кижилеринге ханы кажыыдалды илереттивис.

Делег Байыр Балыкчыевич 2005 чылдың май 7-де Бай-Тайга кожууннуң Тээли сумузунга төрүттүнген. Ортумак школаны кончуг эки дооскан соонда, улаштыр шериг хүлээлгезин Челябинск облазының Чебаркуль хоорайының 93992 дугаарлыг шериг кезээнге эрттирип турган. Спорттуң бүгү талаларынга дески, боду кончуг бүдүштүг, эш-өөрзүрек, ажылчын, эрестиг, ада-иезиниң улуг даянгыыжы, бүзүрелдиг чөленгиижи болуп чораан.

Чуртталгазының сѳѳлгү хүннеринге чедир чоннуң амыр-тайбың чоруу дээш камгалакчы хүлээлгезин күүседип тургаш, 2024 чылдың август 21-ниң хүнүнде чаш назынында чырык өртемейден, төрээн ада-иезинден, чоок төргүл-төрелинден, эш-өөрүнден кезээ мөңгеде чарлып чорутканы биске, тыва чонга, кончуг аар согуг болду. Ооң чазык чараш овур-хевири, аажы-чаңы бистиң чүректеривиске кезээ мөңгеде артар.

Делег Байыр Балыкчыевичиге мөңге алдар!

Бай-Тайга кожууннуң баштыңы, төлээлекчилер хуралының даргазы Экер Байс болгаш кожуун чагырга даргазының хүлээлгезин күүседип турар Чингис Салчак.