«Сылдысчыгаш» солуннуң ай санында үндүрүлгезинде салым-чаяанныг, сонуургак бичии чаштарның дугайында бижип турар бис. Бо удаада база чаңчылывыс үзүктелбээн. Үндүрүлгевистиң маадыры – бичии оолчугаш Байлак. Ол «Малышок» уруглар садынче барып турар. Байлактың өг-бүлезиниң, сонуургалдарының болгаш күзелдериниң дугайында таныжаалыңар, уруглар.

— Чүнү кылырынга ынак сен, Байлак?
— Хостуг үемде планшетке оюннар ой­наарынга ынак мен, ында динозаврлар дыка солун! Оон ыңай динозаврларлыг мультфильмнер көөрүнге ынак мен. Садик барып каапкаш, менталдыг арифметика бөлгүмү база дзюдо секциязынче барып турар мен. Арифметика – школаже белеткенир дээш, а дзюдо – күштүг болур дээш. Мээң ачам база дзюдо спортун сонуургаар турган, ынчангаш ачам-биле дөмей болуксаар мен. Ачам – төрээн чуртунуң болгаш бистиң өг-бүле­вистиң Маадыры!

— Бажыңга дузалажыр-дыр сен бе?
— Өрээлимде ойнаарактарымны эмгелээр, оон бичии кыс дуңмамны ойнадыр мен. Дуңмамны Алина дээр, дыка ынак мен.

— Бажыңыңда дириг амытаннар бар деп дыңнадым. Оларның дугайында чугаалап көрем.
— Бажыңывыста ыт база бичии диис бар. Диисти чоокта чаа эккелген. Алина дуңмам-биле диисти чемгерип, чуп турар бис. Диистиң ады Тимур, Алина дыка диистиг болуксаан, ынчангаш азырап алган бис. Мен ыттарга ынак мен. Ыдывыстың адын Чайка дээр. Ол чайка деп куш ышкаш ак өңнүг. Ыттар дыка шынчы деп бодаар мен, Чайка бистиң бажыңывысты камгалап турар.

— Өзүп келгеш кым болур сен?
— Полицейжи болур мен! Ынчалза-даа чамдыкта повар болур болза, база эки деп бодаар мен: амданныг чемнер кылыр, эң ылаңгыя духовкага дагаа эъди.

— Бо чылда уттундурбас болуп арткан үелериңни чугаалап көрем.
— Чайын авам-биле Киргизия база Казахстан чордувус. Дыка солун болган! Оон ыңай кырган-авам, кырган-ачам сугларның өөнче үргүлчү барып турар мен. Кырган- аваларым, кырган-ачаларым дыка хөй. Ийизи Каа-Хемде чурттап турар (ачамның талазындан), оон ийизи Шагаан-Арыг хоорайда чурттап турар (авамның ава-ачазы). Дыштаныр хүннерде үргүлчү оларже барып турар бис, оон авам-биле хоорайга агаар­лаарга солун.

Угбазы [id498965818|Ананды Середар Байлак дидим, шимченгир, харыысалгалыг база кызымаккай оол кылдыр өзүп олурар. Кезээде улуска дузалажырын кызыдар, чаптанчыг дуңмалыг мен.

Мира КОНГУЛ-ООЛ очулдурган.
Чуруктар өг-бүле архивинден