Тываның Чазааның деткимчези-биле «Бүгү чүүлдү Тиилелгеже!» деп акция республикада уламчылап турар. Бо хүннерде чоннуң чыып турары гуманитарлыг дузаны апрель 30-де аъткарар. Аңаа чедир таптыг-ла ийи неделя азы он дөрт хонук артканы бо.
Тускай шериг операциязында чаңгыс чер чурттугларга ачы-дуза чедирер буянныг үүлеге үзүк-соксаал чок киржип турар албан черлерин демдеглээри чугула.

Бо удаада «Элита» КХН моторлуг хирээни, инвенторлуг генераторну, ээриил ээрер бүрүн дериг-херекселди, демир хайындырып, кожар аппаратты эккеп хүлээткен. Республиканың медицина колледжизи боттарының студентизиниң чагыы-биле генераторну, удуур шоодайны болгаш эм-домну четчелээш хүлээткен. «Буянның оруу» волонтерлар төвү камуфляж четкилерин, жилетти, билектээштерни белеткеп хүлээткен.

Чоннуң чыгганы гуманитарлыг дузаны Донецк, Луганск, Запорожье, Херсон областарынче Улусчу фронтунуң Тывада салбыры организастап чедирер.

Тускай шериг операциязында киржип турар шериглерге дуза кадыксаар болза, апрель 30-ге чедир ам-даа он дөрт хонук мурнувуста. Гуманитарлыг дуза чыылдазынга кады демниг киржип, Тиилелгени чоокшуладырынче Улусчу фронтунуң Тывада салбыры кыйгырып тур.

Дараазында адрестерге деткимчени эккеп болур:

Чульдум кудумчузунуң 40а дугаар бажыңы, Ленин кудумчузунда 5 дугаар бажыңда ТывКУ-да «Кады бис» штавы.

Улусчу фронтунуң Тывада салбырының медээлеринден А.ОНДАР белеткээн.