Айдын Сарыглар: «Санитарлыг дүрүмнерни сагыыры чугула»
Уругларның чайгы дыштанылгазы кидин түлүк эгелээн. Ооң-биле чергелештир ковид аарыының 3-кү чалгыын эмчилер дүвүрел-биле чугаалап турар. #Тыванын_аныяктары» солуннуң редакциязы уруг-дарыын лагерьлерге дыштандырар күзелдиг аныяк ада-иелерге эмчиниң тайылбырын номчуурун сүмеледивис.
ТР-ниң Кадык камгалал яамызының оралакчы сайыды Айдын Сарыглар уругларның чайгы дыштанылгазынга уткуштур назы четпээннерге коронавирус аарыының талазы-биле тайылбырны кылган: — Назы четпээн уруглар ортузунда коронавирус хамчыынга хамаарыштыр чугаалаар болза, эрткен чылдың 9 айдан тура аараан уругларның саны 333 кижи болган. Бо чылдың эгезинден санаар болза, 59 кижи. Ооң соонда аарыг уруглар база немешкен. Ковидтен бичии улус база дөмей-ле аарып болур, аарып турар. Ынчангаш масканы кедип, санитарлыг дүрүмнерни сагыыры чугула. Бичии улус аарыгны чеже-даа чиик эртер болза, ол бичии кижи ада-иезин, кырган ада-иезин аартып болур.
Чайгы үеде уругларның кадыкшылга лагерьлеринге уруглар анализтерин дужаагаш, дыштанып эгелей бергенин Айдын Сарыглар демдеглээн.
2021 чылда республиканың девискээринге 151 хүндүскү лагерьниң 1-ги ээлчээниң 149 хүндүскү лагери 6394 уругну хаара тудуп, ажылдап эгелей берген. Ол ышкаш 20 стационар лагерьниң 1-ги ээлчээнге 1395 уругну дыштандырарын планнап турган. Чайгы дыштанылга үезинде хүндүскү лагерьлерге 11 116 уруг, стационар лагерьлерге 3 625 уруг, ниитизи-биле катай хаара 14 741 уруг хаара туттунар.
Бо хүнде 14 лагерьде — «Байлак», «Патриот», «Ушарики», «Родничок», «Шивилиг», «Шолбан-Ак», «Шуралгак», «Ак-Хол», «Менги-Чечээ», «Чодураа», «Отчугаш», «Металлург», «Таежный», «Орленок» — 987 уруг дыштанып турар.
Бирги ээлчегде – хүндүскү лагерьлерде 1650 ажылдакчы, стационар лагерьлерде 474 ажылдакчы база 367 эмчи ажылдакчы (3 ээлчегде), оларның санында 49 педиатр болгаш 318 ортумак эмчи ажылдакчызы хаара туттунган. Лагерьлерге ажылдаар ажылдакчылар Росхереглелхайгааралының негелдези езугаар COVID-19 анализин албан дужаар. 1716 кижи вакцинацияның ийи чадазын эрткен база Антитела (ИФА) анализин албан дужаар дээрзин сагындыраал.
Алена НАН-ХОО

#стопкоронавирус #летнийотдых #дети #тыванын_аныяктары