Шагаа байырлалының хүннеринде массалыг хемчеглер үезинде маска кедер чурумну сагыырын Тываның Кадык камгалал яамызы сагындырып турар. Оон аңгыда чонну ковид болгаш ОРВИ аарыгларынга удур тарылганы эртип алырын сүмелээн.
Амгы үеде грипп болгаш коронавирустуң чаа хевиринден аараан кижилерниң саны көвүдеп турар. Эрткен неделя 256 аарыг кижини илереткен. Ооң уламындан чурттакчы чон катап база маскаларны ажыглаары чугула.
Эмчилерниң дыңнадып турары-биле алырга, грипп болгаш коронавирустан кижи деңге аарып болур. Ынчангаш чартык чыл эрткенде-ле, covid-19 аарыынга удур тарылганы эртери чугула.
