Коронавирустан аараан кижилерни эмнээри-биле Кызылдың № 16 школазында госпитальды ажыдар дугайында шиитпирни үндүрген. Аңаа аарыг кижилерге немей оруннарны белеткеп эгелээн.
Ол дугайында айтыышкынны Тываның Баштыңының хүлээлгезин күүседип турар Владислав Ховалыг үндүрген. Бо шакта ында белеткел ажылдары чоруп турар. Кежээден бээр аарыг кижилерни хүлээп эгелээр. Түр госпитальга 150 орунну салыр.
Бо хүннүң медээзи-биле Тывада 191 ковид аарыглыг кижилер бүрүткеттингенин сагындыраал. Оларның аразында 135 кижи ортумак назылыг, 35 — 17 хар чедир назылыг уруглар, 21 пенсионер бар. Дорт харылзаалыг 603 кижи илереттинген. Амгы үеде хостуг оруннар 20.7 хуу. Эмчиниң хайгааралының адаанда 2260 кижи бар, амбулаторлуг эмнээшкинни 3684 кижи ап турар, эмчиде 1384 кижи чыдар.
Ооң-биле чергелештир республиканың кол санитар эмчизи Людмила Салчак пандемия үезинде чаа кызыгаарлаашкыннарны киирерин саналдаан. «Кол санитар эмчи Людмила Салчак чаа кызыгаарлаашкыннарны киирерин саналдаан. Республикада оперштабка ону шалыпкын сайгарып көөрүн даастым. Ондактыг талаларын база көөрү чугула. Тывада бүрүткеттинген чаа индий штамм коронавирустуң ооң мурнунда хевирлеринге бодаарга, кончуг дүрген чыпшыныычал, айыылдыг. Кызыгаарлаашкын хемчеглерин күштелдирип турарывыс дээрге-ле эрткен чылдың бо үезинден коронавирус аарыының көргүзүглери ашкан» — деп, Тываның Баштыңының хүлээлгезин күүседип турар Владислав Ховалыг бодунуң блогунда бижээн.
Мира КОНГУЛ-ООЛ.
Чурукту Интернеттен алган.
#стопкоронавирус #госпиталь16 #пандемия #санитарныйврач #тыванын_аныяктары