2026 чылдың май 23-те республиканың төвү Кызылга болуп эртер «ЗаБег.РФ» бүгү-россия чергелиг Х-гу чартык марафон чарыжынга кирэир күзелдиг кижилерден билдириишкиннер хүлээп алыры республикада эгелээн. Кадык амыдыралды нептередири, массалыг спортту хөгжүдери, регионнуң чурттакчыларын доктаамал күш-культураже хаара тудары хемчегниң кол сорулгазы дээрзин организакчылар демдеглээн.

Чурттуң бүгү булуңнарындан киржикчилерни чыгган бо улуг хемчээлдиг спортчу хемчегниң стартын Россияның шупту регионнарында үе-шак аайы-биле деңге эгелээри чаңчыл апарган. Бо чылын чурттан дашкаар эртер чартык марафон делегей чергелиг One Run брендиниң адаа-биле болур. Чартык марафон чарыжының хүнүнде киржикчилерге болгаш көрүкчүлерге концерт-хөглээшкин программазын база шаңнал тыпсыр езулалды белеткээн.

2026 чылдың апрель 1-ден май 18-ке чедир чартык марафонга электероннуг бүрүткел ажыттынар. Бүрүткеттинген киржикчилер чарыш пакеттерин майның 19-тан 21-ге чедир Кызылда Советтиг Тываның 5 чылы стадионунга алыр.

Киржикчилер чарыштың элээн каш хемчээлдерин: 21,1 км, 10 км, 5 км база 1 км-ни шилип ап болур. Эң бичии киржикчилерге 1 километрге чарышты тускайлаан, аңаа ада-иези-биле кады киржип болур.

Эмчи чөпшээрели бар кижи бүрүзү чарышка киржип болур. Назы-харын көрүп кайы хемчээлге киржирин шилип алыр: 18 хардан өрү назылыг киржикчилер 21,1 база 10 км-ге, 16 хардан өрү — 5 км, 10-дан 14 харга чедир назылыглар уруглар чарыжынга киржир.

Бүгү республикадан болгаш Россияның өске-даа регионнарындан 1000 хире киржикчини чартык марафон хаара тудар ужурлуг.
Забег.рф албан езузунуң сайтызындан база Тываның Спорт яамызының информастыг курлавырларындан бүрүткедириниң болгаш киржиржириниң дугайында тодаргай медээни көрүп болур.