Кызылда Советтиг Тываның 5 чылы стадионга ча адарынга Россияның Кубогу дээш маргылдааның байырлыг ажыдыышкыны болуп эрткен. Тываның Чазааның Даргазының оралакчызы Орлан Сарыглар маргылдааның киржикчилеринге, тренерлерге болгаш аарыкчыларга байырны чедирген. Тыва эстраданың билдингир артистери база уран-талантылыг бичии самчылар спортчуларга болгаш аалчыларга оюн-көргүзүүн бараалгаткан.

Классиктиг ча адар маргылдаалар үш хүн уламчылаар. Кубок дээш маргылдааның 70 метр база 50 метр ырак хемчээлдерге хууда болгаш командазы дээш эр болгаш херээжен спортчулар күжүн шенээр.

Россияның Кубогу дээш маргылдаада чурттуң он үш регионундан, азы Бурят, Саха (Якутия) республикалардан, Забайкалье база Красноярск крайлардан, Тула, Ростов, Ярославль, Псков, Новосибирск, Свердловск областардан, Ямал-Ненец автономнуг округтан, Москва хоорайдан база Тывадан 200 хире адыгжылар киржип турар. Россияның ча адар федерация президентизи Зоригто Манханов биле херээженнерниң ча адар чыынды командазының улуг тренери Галина Шадрина хүндүлүг аалчылар кылдыр маргылдаада чедип келген.

Маргылдааның кол судьязы Елена Достай Тывага мындыг улуг маргылдааларны эрттирери – улуг ужур-уткалыг болуушкун дээрзин демдеглээн. Республика ча адарынга российжи хемчээлдиг маргылдааны ийи дугаар эрттирип турары бо. 2024 чылда, чурттуң 24 регионундан 200 ажыг спортчулар киришкен Россияның ча адар чемпионадын республика бир дугаар эрттирген. Ол маргылдаалар делегей чергелиг маргылдааларже шилилдениң бир чадазы болур.