Барыын-Хемчик кожуунда Кызыл-Мажалыктың 2 дугаар школазының башкызы Мерген Сюрюн СТС каналга «Остров сокровищ. Знаки судьбы» теле-шоуга 10 сая рубльди тиилеп алыр дээш демисежир. Ол элээн каш муң кордакчылар аразындан кастингини эрткеш, ук каналга «Остров сокровищ. Знаки судьбы» төлевилелге киржир эргени чаалап алган.

«Остров сокровищ. Знаки судьбы» — онза ужуралдарлыг российжи реалити-шоу, ында киржикчилер ээн ортулукка бергелерни ажып эртип, соок-хатта-даа, изиг-халыында-даа амыдыраар дээш демисежир. Киржикчилер бир ай дургузунда чүү-даа чок черге нарын шенелделерни эртип тургаш чурттаарлар. Бир шенелдени чедиишкинниг эрткеш, орнунга амыдыраарынга херек чүүлдерни алырлар, чижээлээрге, аъш-чем, бонустар азы өске-даа курлавырлар. Шоунуң түңнел чадазынга чүгле дөрт киржикчи артарын сагындыраал.

«Чаңгыс чер чурттугларымга четтиргенимни илередип тур мен. Теле-шоу август 31-де 18.00 шакта СТС каналга болур» — деп, ол социал четкилерде дамчыткан.

Республиканың чурттакчы чону көшкүн амыдыралдыг, чер, мал ажыл-агыйы-биле сырый холбаалыг болганындан чаңгыс чер чурттуувус Мерген Сюрюн чуртталганың «чаагайжыттынмаан» байдалдары-биле чоок таныш. Ынчангаш ол реалити-шоуга бодунуң быжыг тура-соруу-биле тиилеп алыр аргалыг.

Башкыга чедиишкиннерни күзээлиңер!

Минобр Тувы