Дүүн «Тайга» станциязынга кышкы спортчу сезону ажыткан. Ооң кол организакчылары республиканың Аныяктар херээниң талазы-биле агентилел болгаш Кызыл хоорайның аныяктар политиказы болгаш спорт департаментизи болганын сагындыраал.

Бо чылын кышкы спортчу сезоннуң ажыдыышкынының үезинде аалчыларны хөглүг оюннар болгаш амданныг шашлык база манап турган. «Шашлык-шоуга» хөй-ниити чемненилге черлери киришкеш, эътти ыштаан чаагай чемни белеткээринге маргышкан.

Эң-не чаагай шашлыкты белеткээн тиилекчини илередирде, жюри кежигүннери шупту талазын өөренип көрген. Ынаар чемни чараштыр салганы, амданы, рецептизиниң тускайы болгаш эстетиктии база кирген. «Кайгамчыктыг мөөрей-дир. Кулинарлыг маргылдааларны ам-даа эрттирери күзенчиг. Чаагай-дыр» — деп, кызылчылар чугаалап турган.

«Шашлык-шоунуң» тиилекчизи хууда сайгарлыкчы Е. Лиснеев болган, а ийиги черни Кызылдың 22 дугаар уруглар сады, үшкү черни 40 дугаар уруглар сады ээлээн.
#шашлыкшоу #спорт #тыванын_аныяктары