Тываның спортчу залдарында бо бичии оолчугашты эки таныыр. Кажан ол чадыгже үнүп турда, ооң көрүжү шириин апаар. Ынчалза-даа спортчу маргылдаалар төнерге, бистиң мурнувуста күш-культура кичээлинге ынак база бичии дуңмаларынга дузалажыр 4-кү классчы оолак көстүр. Бөгүнгү аалчывыс – бичии спортчу, Кызылдың 12 дугаар школазының өөреникчизи Артем Самбый-оол.
Ол күш-культура кичээлинге ынак. Кичээлге ойнаар, шураар, маңнаар. Кичээлдер соонда дыштанып, оюннар ойнаар аргалыг.
«Спорттуң аңгы-аңгы хевирлерин сонуургаар мен. Чоокта чаа Тывага панкратион маргылдаазынга киришкеш, шаңналдыг черни ээледим. Абаканга грепплинг маргылдаазынга киришкеш, бирги черде болдум. Оон ыңай Абаканга эрткен армейжи хол-биле демисел маргылдаазынга база бирги черни ээлээн мен. Тывага ушу-саньда маргылдаазынга база бирги черде болдум» — деп, Артем тайылбырлаан.
Бичии спортчуга ада-иези деткимчени көргүзүп турар. Чүгле Тыва иштинге эвес, а өске хоорайларже спортчу маргылдааларже доктаамал чоруп турарлар. Чоокта чаа Сибирьниң чемпионадынга киржип, Новосибирск хоорайже баргаш келгеннер.
«Авам, ачам меңээ улуг деткимчени көргүзүп турарлар. Олар эвес болза, берге болур боор. Оон ыңай эштерим мээң чедиишкиннеримге өөрүп, мени деткип турар» — деп, ол чугаалаан.
Артем спортчу белеткелдерден чыда калбас, сагылга-чурумга өөренген. Ындыг-даа болза ооң аажы-чаңын чымчак деп болур.
«Аачы-чаңым чымчак. Шыдамыккай, харыысалгалыг болур дээш кызар мен. Улус-биле чугаалажырынга ынак мен, эп-найыралга ынак» — деп, ол бодун таныштырган.
Артем өзүп келгеш спорттуң хевирлеринге чемпион болур күзелдиг. Ыяап-ла бүгү делегей клазының спорт мастери. Оон аңгыда UFC-тиң чемпиону болур.
«Бодумнуң тренерим – Аржаан Кыргыс ышкаш болуксаар мен. Оон ыңай база бир кумирим — Чаян-Кежик Монгуш. Ол панкратион хевирде Россияның спорт мастери.
Мира КОНГУЛ-ООЛ очулдурган.
Өг-бүлениң чуруу
