Чеди-Хөл кожууннуң Сайлыг суурунуң «Эзирлерниң уязы» спортзалынга делегей чергелиг ат-сураглыг спортчу Артас Санаа база Буян Сүктер аныяк мөгелер-биле ужуражылганы эрттирген.
2021 чылда Олимпий оюннарының хүлер медалын чаалап алган база делегей чемпионаттарының мөңгүн болгаш хүлер призеру, Азияның хостуг хүрешке чемпиону Артас Санаа бичии мөгелерге мастер-классты эрттирбишаан, ада-иелерниң, спортчуларның айтырыгларынга харыылаан. Ол ышкаш Тес-Хем кожууннуң Арзылаң мөгези, «Алдар» спортчу школазында дээди категорияның тренери Буян Сүктер аныяк-өскенге арга-сүмезин каткан. Ат-сураглыг спортчулар аныяктарга үелегер-чижек болуп, оларның кижизидилгезинге улуг үлүг-хуузун киирип чорууру чугаажок.
