ХХХ-ги хостуг хүрешке Россия чемпионады доозулган. «Матч ТВ» федералдыг каналдан ону Россияның шупту чурттакчылары көөр аргалыг болган. А чемпионаттың эки турачылары болгаш организакчылары боттарының бодалдарын илередип турар.
«ТА»-ның редакциязынга Олимпийжи курлавырлар спортчу школаның директору Буян Биче-оол мынчаар чугаалаан:
— ХХХ-ги хостуг хүрешке Россия чемпионады доозулган. Катап өөренген аайым-биле ажылчын байдалымче кирип эгеледим. Ынчалза-даа чемпионаттың Тывага эрткен хүннерин чүнүң-биле-даа деңнеп шыдавас. Чемпионат, хөөредиг чокка, бедик деңнелге эрткен. Ону бистиң республикавыстың удуртулгазы болгаш Россияның спортчу демисел федерациязы, спортчулар болгаш шииткекчилер бедик үенелээн. Маргылдааны эки эрттиреринге агаар-бойдус безин дузалаан. Бо хире бедик деңнелдиң маргылдааларынга маргыжыышкыннар туруп кээр чүве. Биске ындыг чүве шуут болбаан.
Оон аңгыда Тываның чыынды командазы 25 чыл бурунгаар болган чемпионат ышкаш, шак-ла ындыг түңнелдерлиг болган. Бо удаада Начын Монгуш мөңгүн медальды чаалап алган, ынчан – Аян Кара-оолович Сараа. Ынчан база-ла тыва мөге хүлер медаль дээш демисежип тургаш, алзыпкан турду. Бо удаада база хүлер медаль Амир Чамзандан тая берди. Ынчалза-даа аныяк мөгелеривиске дөмей-ле чедиишкиннерни күзеп тур мен. Начын биле Амир – шыырак дээн спортчулар!
Мира КОНГУЛ-ООЛ белеткээн.
