Хостуг хүрешке Россия чемпионадының иштинде Тыва Республикага спортту сайзырадыр база аныяк-өскенниң ортузунга кадык амыдыралды суртаалдаар сорулга-биле «Тыва Республиканың школаларынга спортчу демисел» деп эртем-практиктиг конференция болуп эрткен. Ону Тываның Чазаа Россияның Спортчу демисел федерациязының деткимчези-биле эрттирген.
Конференция үезинде Тывага спортчу демиселди сайзырадырының чугула айтырыгларын сайгарган. Эртен, июнь 25-те, Тыва биле Россияның Спортчу демисел федерациязы кады ажылдажылга дугайында керээге атты салыр.
«Хостуг хүрешке Россия чемпионады бистиң республикавыста болуп турары кайгамчык-тыр. Шак мындыг бедик деңнелдиг спортчу маргылдаалар аныяк-өскенниң кичээнгейин хаара тудары чугаажок. Мында келген ат-сураглыг мөгелер тыва оолдарга үлегер-чижек болур. Спортче уругларны чажындан хаара тудары күзенчиг. Спорт оолдарны корум-чурумга өөредир, аажы-чаңы шын хевирлеттинеринге дузалаар» — деп, хостуг хүрештиң аарыкчызы Аяс Баян «ТА»-ның корреспондентизинге чугаалаан.
Мира КОНГУЛ-ООЛ.
