ТР-ниң өөредилге сайыдының бирги оралакчызы Ирина Сарагашева шак ындыг медээни бөгүн аппарат хуралында берген. Тоску класстың кол күрүне шылгалдазын (ГИА-9) 5669 кижи дужаар. Эрткен чылга деңнээрге 342 доозукчу хөй. А 11 класстың доозукчулар шылгалдазын 2729 кижи тудар. Эрткен чылга деңнээрге 508 кижи эвээш (2021 чылда – 3237).
Бо чылын республиканың ниити билиг школаларының 11-ги клазын 2121 кижи доозуп турар. А 92 кижи (2021 чылда – 105) кежээки школаның 12 клазын доозарлар. Эдип-чазаар колонияларда өөредилге черлериниң 12-ги клазын 46 кижи (2021 чылда – 55) өөренип доозар. Ортумак профессионал өөредилге черлеринде 24 сургуул (2021 чылда -55), эрткен чылдарның дозукчуларындан 446 кижи (2021 чылда – 618) күрүне шылгалдаларын дужаарынга белен.
2020, 2021 чылдарда 9 класс доозукчулары коронавирус пандемиязының уржуундан, шилилделиг шылгалдалар дужаваан турган. Бо чылдың тос класс доозукчуларының көвей кезии боттарын шенеп көөр деп шиитпирлеп, ынак эртемнерин шилип алган. 2084 тоску классчылар ниитилел билиглеринге шылгалданы дужаар, ГИА-9-та киржип турар шупту доозукчуларның 36,7 хуузу. Информатика база ИКТ-ны – 1566 кижи, доозукчуларның 27,6 хуузу шилип алган. 2019 чылга деңнээрге, 16,5 хуу хөй. Үшкү черде географияны шилээн – 1345 кижи. Биологияны 1263, физиканы 440 кижи шилип алган.
Ниитилел билиглери дээш адын бижиткен 11 класстың доозукчуларының саны база хөй болган. Доозукчуларның 48,3 хуузу. Азы 1320 кижи ол эртемге күрүне шылгалдазын дужаар. Ийиги черде — физика (доозукчуларның 37,1 хуузу), азы 1 015 кижи билиин хынаар. 804 кижи биологияда бижиткен. Ханы угланыышкынныг математиканы 803 кижи дужаар, эрткен чылдан 16,9 хуу эвээш. А информатиканы 597 шилип ап, ооң-биле холбаалыг мергежилдерни чедип алыр сорулгалыын дыңнаткан.

Тыва Чазак